ۇكىمەت كەنتاۋ، ريددەر جانە قىزىلورداداعى جىلۋ كوزدەرىن جاڭعىرتۋعا 16 ملرد تەڭگە بولگەن، دەپ حابارلايدى "ادىرنا" ۇلتتىق پورتالى BAQ.KZ-كە سىلتەپ.
قازاقستان ۇكىمەتى پرەزيدەنت تاپسىرماسىمەن ەلىمىزدىڭ جىلۋ ەلەكتر كەشەنىن اۋقىمدى جاڭعىرتۋ بويىنشا بيىل رەزەرۆتەن قوماقتى قارجى بولگەن.
پرەمەر-مينيستر ولجاس بەكتەنوۆتىڭ قول قويۋىمەن كەنتاۋداعى جەو-5-ءتىڭ № 7, 8, 9, 10, 11 جانە 12 قازاندىقتارىن رەكونسترۋكتسيالاۋعا 9 ملرد تەڭگەدەن استام، ريددەر جىلۋ ەلەكتر ورتالىعىنىڭ تەحنولوگيالىق جابدىقتارى مەن ينفراقۇرىلىمىنا كۇردەلى جوندەۋ جۇرگىزۋگە – 4,9 ملرد تەڭگە، ال قىزىلورداداعى وڭتۇستىك قازاندىقتىڭ ءۇش بۋ قازاندىعىن رەكونسترۋكتسيالاۋعا – 2 ملرد تەڭگەدەن ءسال استام قاراجات ءبولىندى. وسىلايشا، اتالعان جىلۋ كوزدەرىن جاڭعىرتۋعا جالپى سوماسى شامامەن 16 ملرد تەڭگە باعىتتالدى.
قابىلدانىپ جاتقان شارالار الدىمىزداعى جىلىتۋ ماۋسىمىندا كەنتاۋ، ريددەر جانە قىزىلوردا تۇرعىندارىن جىلۋمەن تۇراقتى قامتاماسىز ەتۋگە مۇمكىندىك بەرەتىنى ايتىلدى.
