پرەزيدەنت قاسىم-جومارت توقاەۆ قازاقستان حالقىنا جولداۋىندا «بالقاش» اەس قۇرىلىسى 2027 جىلى باستالۋى كەرەكتىگىن ايتتى، دەپ حابارلايدى «ادىرنا» ءتىلشىسى.
مەملەكەت باسشىسىنىڭ سوزىنشە، اتوم ەنەرگەتيكاسىن دامىتۋ جانە ەلدەگى اتوم ەلەكتر ستانتسيالارىن ۋران شيكىزاتىمەن ۇزاق مەرزىمدى قامتاماسىز ەتۋ ماسەلەسى ايرىقشا ماڭىزعا يە. وسىعان بايلانىستى ول ۋراننىڭ مەملەكەتتىك ستراتەگيالىق قورىن قۇرۋ تۋرالى ۇسىنىستى بايىپپەن قاراستىرۋ قاجەتتىگىن اتاپ ءوتتى. ونىڭ پىكىرىنشە، مۇنداي قور قازاقستانداعى اەس-تەردىڭ الداعى ءبىر عاسىرداعى قاجەتتىلىگىن وتەۋگە مۇمكىندىك بەرەدى.
«كەلەسى جىلى-اق «بالقاش» اەس قۇرىلىسىن باستاۋدى جانە «مويىنقۇم» اەس قۇرىلىسىن بارىنشا تەزىرەك باستاۋ ماقساتىندا كەشەندى ىنتىماقتاستىق تۋرالى كەلىسىمگە قول قويۋدى مۇمكىن ءارى قاجەت دەپ سانايمىن»،– دەدى پرەزيدەنت.
قاسىم-جومارت توقاەۆ اتوم ەلەكتر ستانتسيالارىنىڭ قۇرىلىسىنا قاتىساتىن شەتەلدىك سەرىكتەستەردى قازاقستاندا جوعارى تەحنولوگيالىق وندىرىستەر اشۋعا، يادرولىق ەنەرگەتيكا سالاسىنداعى تاجىريبە مەن قۇزىرەتتەردى بەرۋگە، سونداي-اق وتاندىق اتوم سالاسى ماماندارىن دايارلاۋعا تارتۋدىڭ ماڭىزىن اتاپ ءوتتى. مۇنداي ۇسىنىستاردى رەسەي مەن قىتاي كومپانيالارى بىلدىرگەن. بۇل رەتتە كەلىسسوزدەردەگى بارلىق ۇستانىم قازاقستاننىڭ ۇلتتىق مۇددەلەرىن ەسكەرە وتىرىپ، مۇقيات پىسىقتالىپ، كەلىسىلۋى كەرەگى ايتىلدى.
