فوتو: Reuters
ۋكراينانىڭ كيەۆ وبلىسى بۋچان اۋدانىنداعى وق-ءدارى قويماسىندا بولعان ءورت سالدارىنان كەمىندە 27 ادام قازا تاپتى، دەپ حابارلايدى “ادىرنا” DW-عا سىلتەپ.
تاعى 42 ادام جاراقات العان. وقيعا رەسەيدىڭ شابۋىلىنان كەيىن بولدى.
ۋكراينا پرەزيدەنتى ۆلاديمير زەلەنسكيدىڭ مالىمەتىنشە، سوققى 28 تامىزعا قاراعان ءتۇنى جاسالعان. جارىلىستاردان كەيىن قويما اۋماعىندا ءورت شىققان.
زەلەنسكيدىڭ ايتۋىنشا، شابۋىل سالدارىنان ماڭايداعى ينفراقۇرىلىمعا دا ايتارلىقتاي زيان كەلگەن. تۇرعىن ۇيلەر، قارتتار مەن مۇگەدەكتىگى بار ادامدارعا ارنالعان پانسيونات زاقىمدانعان.
وقيعا ورنىنان 370-تەن استام ادام ەۆاكۋاتسيالانعان. ەۆاكۋاتسيا جۇمىستارى جالعاسىپ جاتىر.
كيەۆ وبلىستىق اسكەري اكىمشىلىگىنىڭ باسشىسى تيمۋر تكاچەنكونىڭ مالىمەتىنشە، جارىلىستاردان كەيىن وقيعا ورنىنا جاقىن ورنالاسقان شامامەن 50 عيمارات بۇلىنگەن.
ۋكراينا باس پروكۋراتۋراسى وقيعاعا بايلانىستى قىزمەتتىك نەمقۇرايلىلىق فاكتىسى بويىنشا قىلمىستىق ءىس قوزعادى. تەرگەۋ بارىسىندا رەسەيلىك شابۋىلدىڭ بارلىق ءمان-جايى، سونداي-اق جارىلىس قاۋپى بار زاتتار مەن ماتەريالداردىڭ كاسىپورىن اۋماعىندا ساقتالۋىنىڭ زاڭدىلىعى تەكسەرىلەدى.
ۋكراينا بيلىگى وق-دارىلەردى تۇرعىن ۇيلەرگە جاقىن جەردە ورنالاستىرۋعا بولمايتىنىن حابارلادى.
ال رەسەي قورعانىس مينيسترلىگى سوققى وق-ءدارى قويماسىنا جاسالعانىن حابارلادى. ۆەدومستۆونىڭ مالىمەتىنشە، قويمادا FP-1 جانە FP-2 قاشىقتان باسقارىلاتىن ۇشقىشسىز ۇشۋ اپپاراتتارىنا ارنالعان بولشەكتەر مەن ىسكە قوسۋ ۇدەتكىشتەرى ساقتالعان.
