مەملەكەت باسشىسى قاسىم-جومارت توقاەۆ «كوپپوليارلى الەمدەگى ەۋرازيالىق ينتەگراتسيا» اتتى ەۋرازيالىق ەكونوميكالىق فورۋمدا بىرقاتار ماڭىزدى باعىتتارعا توقتالدى. ەۋرازيالىق ەكونوميكالىق وداقتىڭ وزگە ەلدەرمەن ىنتىماقتاستىعى جايلى ءسوز قوزعاپ، ۇيىمعا مۇشە مەملەكەتتەردىڭ ناقتى ماقسات-مىندەتتەرىن اشىپ ايتتى، دەپ حابارلايدى "ادىرنا" ۇلتتىق پورتالى.
«وداقتىڭ نەگىزگى ساياسي جانە ەكونوميكالىق سەرىكتەسى – قىتاي حالىق رەسپۋبليكاسىمەن. قىتايمەن ءوزارا ءتيىمدى ءىس-قيمىل قۇرۋ وتە ماڭىزدى. ءبىز ءۇشىن قىتاي ەڭ ءىرى جۇك جونەلتۋشى ەل جانە ەڭ ءىرى كليەنت بولىپ وتىر. وتكەن اپتادا مەن وسى ەلگە مەملەكەتتىك ساپارمەن باردىم. ءبىز قىتايدىڭ سيان قۇرعاق پورتىندا قازاقستاننىڭ لوگيستيكالىق ورتالىعى قۇرىلىسىن ىسكە قوستىق. بۇل پورت ورتالىق ازياعا، ەۋروپاعا، تۇركياعا جانە يرانعا تىكەلەي كونتەينەرلىك پويىزداردى جىبەرۋدىڭ نەگىزگى حابى بولادى دەپ كۇتەمىز»، - دەدى قاسىم-جومارت توقاەۆ «كوپپوليارلى الەمدەگى ەۋرازيالىق ينتەگراتسيا» اتتى ەۋرازيالىق ەكونوميكالىق فورۋمدا.
سونداي-اق، باقتى-اياگوز ايماعىندا قحر ءۇشىن جەكە شەكارا وتكەلىن سالۋ مەن تەمىرجول قاتىناسىن باستاۋ جوسپارلانىپ وتىرعانىن جەتكىزدى.
پرەزيدەنت ءوز سوزىندە رەسەيمەن دە تابىستى ىنتىماقتاستىققا ءۇمىت ارتاتىندىعىن جەتكىزدى. ويتكەنى مۇنداي جوبا قىتاي ءۇشىن تەك قازاقستاننان عانا ەمەس، باتىس سىبىردەن دە تاۋار جەتكىزۋ قاشىقتىعى مەن مەرزىمدەرىن ەداۋىر قىسقارتادى.
«فيزيكالىق ينفراقۇرىلىمدى دامىتۋدان بولەك، جۇمساق ينفراقۇرىلىم قۇرۋعا، ياعني تسيفرلاندىرۋعا، كەدەندىك اكىمشىلەندىرۋدى جەڭىلدەتۋگە جانە اكىمشىلىك جۇكتەمەنى ازايتۋعا ءمان بەرۋ دە وتە ماڭىزدى. جالپى، ءبىز قازىر ەۋرازيانىڭ بۇعان دەيىن ەشقاشان بولماعان جاڭا ىرگەتاسىن قالاپ جاتىرمىز دەۋگە بولادى. ەگەر وسى ماسەلەگە مۇقيات جانە بىرلەسىپ قاراساق، ايتارلىقتاي ەكونوميكالىق جانە ساياسي ديۆيدەندتەر الا الامىز. وسى تۇرعىدا تولىققاندى جانە سىندارلى حالىقارالىق ىنتىماقتاستىعىمىزدىڭ قانشالىقتى ماڭىزدى ەكەنىن تۇسىنەمىز دەپ ويلايمىن»، - دەدى قاسىم-جومارت توقاەۆ.
قاسىم-جومارت توقاەۆ بۇل ەرەكشەلىكتەردى ەسكەرە وتىرىپ، قىتايمەن، ۇندىستانمەن، ۆەتناممەن، يرانمەن، ەگيپەتپەن، يزرايلمەن، سەربيامەن جانە باسقا سەرىكتەستەرمەن بەلسەندى قارىم-قاتىناس ورناتۋ ارقىلى وداقتىڭ جانداناتىنىن مالىمدەدى. مۇنداي كەڭاۋقىمدى قارىم-قاتىناس وداقتىڭ ساۋدا-ەكونوميكالىق ماڭىزىن ارتتىراتىنىن باسا ايتتى.
ەسكە سالا كەتەيىك، قر پرەزيدەنتى قاسىم-جومارت توقاەۆ جوعارى ەۋرازيالىق ەكونوميكالىق كەڭەستىڭ وتىرىسىنا قاتىسۋ ءۇشىن اراعا 15 كۇن سالىپ ماسكەۋگە باردى.
"ادىرنا" ۇلتتىق پورتالى
