فوتو: Subaas Shrestha/NurPhoto/picture alliance
نەپال مەن قىتاي شەكاراسىنداعى تابيعي اپات بولعان ايماقتا قازاقستاننىڭ ەكى ازاماتشاسىن ىزدەستىرۋ جۇمىستارى جالعاسىپ جاتىر. بۇل تۋرالى قر سىرتقى ىستەر مينيسترلىگىنىڭ رەسمي وكىلى جانبولات ۇسەنوۆ مالىمدەدى، دەپ حابارلايدى “ادىرنا”.
بۇعان دەيىن ولاردىڭ ءبىرىنىڭ تۋريستىك توپ قۇرامىندا نەپالدان قىتاي اۋماعىنا وتكەندىگى حابارلانعان بولاتىن.
سىرتقى ىستەر مينيسترلىگىنىڭ مالىمەتىنشە، قازاقستاندىق ديپلوماتتار جەرگىلىكتى بيلىك ورگاندارىمەن بىرلەسىپ جۇمىس جۇرگىزىپ جاتىر. سونىمەن قاتار جوعالعان ازاماتتاردىڭ جاقىندارىمەن تۇراقتى بايلانىس ورناتىلعان.
“قر سىرتقى ىستەر مينيسترلىگى جەرگىلىكتى مەملەكەتتىك ورگاندارمەن جۇمىستى جالعاستىرۋدا. وتانداستارىمىزدىڭ تۋىستارىمەن تۇراقتى بايلانىستامىز”،– دەدى جانبولات ۇسەنوۆ.
الەۋمەتتىك جەلىلەردە ىزدەستىرىلىپ جاتقان قازاقستاندىق تۋريستەردىڭ اتى-ءجونى دە جاريالاندى. ولار – 1982 جىلى تۋعان اننا ششەربا مەن يرينا بلونسكايا.
ايتا كەتەيىك، بۇعان دەيىن نەپالدان قىتايعا وتكەن تاعى ءبىر قازاقستاندىق ءتۋريستىڭ ىزدەستىرىلىپ جاتقانى حابارلانعان ەدى.
قازىرگى ۋاقىتتا نەپالداعى جويقىن سۋ تاسقىنى مەن لاي كوشكىنىنىڭ سالدارىنان قازا تاپقاندار سانى 469 ادامعا جەتكەن. سونىمەن قاتار 800-دەن استام جەرگىلىكتى تۇرعىن مەن شەتەلدىك ازاماتتىڭ تاعدىرى ءالى بەلگىسىز.
وڭىردە قۇتقارۋ جانە ىزدەستىرۋ جۇمىستارى جالعاسىپ جاتىر. الايدا تابيعي اپات ايماعىندا جاڭا سۋ تاسقىنى مەن كوشكىن قاۋپى ءالى دە ساقتالىپ وتىر.
