نەپالداعى بحوتە-كوشي وزەنىندە بولعان سۋ تاسقىنىنان كەيىن كەمىندە 384 تۋريست حابار-وشارسىز كەتتى. بۇل تۋرالى 26 تامىزدا ەلدىڭ تۋريزم كەڭەسى ايتتى، دەپ حابارلايدى «ادىرنا» ءتىلشىسى.
«تۋريستىك كومپانيالاردان الىنعان الدىن الا مالىمەتتەرگە سايكەس، زارداپ شەككەن ايماقتاردا 384 ءتۋريستىڭ حابار-وشارسىز كەتكەنى انىقتالدى. ولاردىڭ 291-ءى — شەتەل ازاماتتارى، 93-ءى — نەپال ازاماتتارى»،– دەلىنگەن حابارلامادا.
ۆەدومستۆو مالىمەتىنشە، 100-دەن استام ءۇندىستان ازاماتى، 17 مالايزيا ازاماتى، 12 ۇلىبريتانيا ازاماتى، ءتورت وڭتۇستىك افريكا ازاماتى، ءۇش اقش ازاماتى، ءبىر اۋستراليا جانە ءبىر نيدەرلاند ازاماتى حابار-وشارسىز كەتكەن. تاعى 111 ادامنىڭ ازاماتتىعى ازىرگە ناقتىلانباعان.
Ratopati باسىلىمى كەمىندە 16 ادامنىڭ قازا تاپقانىن، 36 ادامنىڭ جاراقات العانىن جازدى.
سۋ تاسقىنى 26 تامىز كۇنى تاڭەرتەڭ مۇزدى-تاس كوشكىنى جۇرگەننەن كەيىن بولعان. سونىڭ سالدارىنان بحوتە-كوشي وزەنىندەگى سۋ دەڭگەيى كۇرت كوتەرىلگەن. تابيعي اپات بىرنەشە ەلدى مەكەندى، جولداردى جانە گيدروەنەرگەتيكالىق نىسانداردى قيراتقان.
ەسكە سالايىق، تامىز ايىنىڭ ورتاسىندا جاپونيادا سوڭعى 60 جىلداعى ەڭ قاتتى نوسەر جاۋعان ەدى. جاۋىن-شاشىن سۋ تاسقىنىنا اكەلىپ، سالدارىنان 10 ادام قازا تاپقان. ماۋسىم ايىندا قىتايدا دا رەكوردتىق جاۋىن-شاشىن سالدارىنان 2,5 ميلليونعا جۋىق تۇرعىنى بار قالا ءىشىنارا سۋ استىندا قالعان. 2024 جىلى نەپالداعى سۋ تاسقىنىنان 193 ادام قازا تاپسا، 2019 جىلى تابيعي اپات 65 ادامنىڭ ءومىرىن قيعان.
