بەلگىلى ديزاينەر ايدا كاۋمەنوۆا جەلىدەگى پاراقشاسىنا بوكسەر انگەلينا لۋكاستىڭ قازاقتىڭ ۇلتتىق كيىمىن جالاڭاش دەنەسىنە كيىپ، face-to-face راسىمىنە قاتىسقان ۆيدەوسىن جاريالادى. الايدا بۇل كوپتىڭ اشۋىن تۋعىزدى، دەپ حابارلايدى “ادىرنا” ۇلتتىق پورتالى.
بۇل تۋرالى تاريحشى-ەتنولوگ، جۋرناليست تۇرار ساتتارقىزى Facebook پاراقشاسىنا پىكىرىن ءبىلدىردى.
“نەتكەن نامىسسىز ۇلت ەدىك. قورلانباعان نەمىز قالدى، وسى؟!
ناعىز قازاقتىڭ مىقتى قىزى،-دەپ جاتىر ەكەن مىنا سوراقىلىقتى بەلگىلى ديزاينەر ايدا كاۋمەنوۆا. ايدا، ۇلتتىڭ، قازاق قىزىنىڭ تازالىعى مەن ادالدىعىنىڭ، ۇياتى مەن ارىنىڭ سيمۆولى بولعان ساۋكەلەسىن قورلاپ، تىرداي جالاڭاش قىزعا كيگىزىپ، ناعىز قازاق قىزى دەۋىڭىز، ار مەن ۇياتتى بارىنەن بيىك قوياتىن، بارشا قازاق قىزدارىنىڭ نامىسىن تاپتاعانىڭىز.
قازاق قىزى قاشان ۇلتتىق كيىمدى جالاڭاش دەنەسىنە كيگەن ەكەن؟ ساكرالدى ماڭىزى بار ۇلتتىق ويۋ-ورنەكتىڭ كيەسى بار دەگەن ۇلت ەمەس پە ەدىك؟!”،- دەدى جۋرناليست.
سونداي-اق، ول جوعارىداعىلارعا ۇندەۋ تاستاپ، ۇلتتتىق قۇندىلىقتارىمىزدى قورعايتىن زاڭ كەرەگىن باسا ايتتى.
“ەل قالاۋلىلارى بولىپ جۇرگەن دەپۋتات مىرزالار، حانىمدار!
قاشانعى ۇلت سيمۆولدارىن وسىلاي قورلاۋعا جول بەرە بەرەمىز؟ نامىستارىڭىز بار ما، ءوزى؟ ۇلت قۇندىلىعىن قورعاي الماساق، نەسىنە ۇلت بولىپ ءجۇرمىز؟ ەل ەرتەڭىنە الاڭداساق، ۇلتتتىق قۇندىلىقتارىمىزدى قورعايتىن زاڭ كەرەك!
انا ءبىر جىلى شىرىن دەگەن قارشاداي قىز قازاق كيىمىن كۇلكى قىلدى. وتكەندە مۋحارياپوۆ دەگەن ءتىلىمىزدى قورلادى. ەندى مىنە، ۇلتتىق كيىمدەردى تىگىپ دارىپتەيتىن، سودان كاسىبىن دوڭگەلەتىپ وتىرعان ۇلتى قازاق ايدانىڭ جاساپ وتىرعانى مىناۋ؟
ايدا حانىم، ۇلتتىڭ دۇنيەنىڭ قادىر-قاسيەتىن بىلمەسەڭىز، بويىڭىزدا قازاقى نامىس بولماسا، جاساپ جۇرگەن ءىسىڭىزدى قويا سالىڭىز. الدە سىزگە ۇلتتىق دۇنيە كاسىپتىڭ كوزى عانا ما؟
اۋ، اعايىن، كىم كورىنگەن ءتول تەڭگەمىزدى تاپتايدى، تۋىمىزدى، ۇلتتىق كيىمىمىزدى قورلايدى، مىڭق ەتپەيتىن نەتكەن حالىق ەدىك؟! وزگە ءبىزدى سىيلاسىن دەسەك، وزىمىزدىكىن قۇرمەتتەۋىمىز كەرەك ەمەس پە؟ وزگە جۇرتقا ابدەن ماسقارا بولعانشا،نامىستان نەعىپ ءولىپ كەتپەيمىز؟!
ايدا كاۋمەنوۆانىڭ پاراقشاسىندا ناعىز قازاق قىزى دەگەن ۆيدەوسىن كورىڭىزدەر، جاۋاپ بەرىڭىزدەر.
نامىس قايدا، جۇرتىم؟!
مەن نامىستى بارىنەن بيىك قوياتىن قازاقتىڭ قىزىمىن، سوندىقتان ايدا كاۋمەنوۆانىڭ ۇلتىمىزدىڭ كيىمىن قورلاعانى ءۇشىن جاۋاپ بەرگەنىن تالاپ ەتەمىن”، -دەپ جازدى تۇرار ساتتارقىزى.
