بۇگىن قىزىلوردادا سىرداريا وزەنى ارقىلى وتەتىن جاياۋ جۇرگىنشىلەر كوپىرىنىڭ كاپسۋلاسىن سالۋ ءراسىمى ءوتتى. وعان وبلىس اكىمى مۇرات ەرگەشباەۆ، زيالى قاۋىم وكىلدەرى مەن ەل اعالارى قاتىستى.
شارادا ايماق باسشىسى سىر ەلىنىڭ باس شاھارىنىڭ دامۋىنا سەرپىن بەرەتىن جوبالارعا توقتالدى. سونىڭ ءبىرى – سىرداريا وزەنى ارقىلى وتەتىن جاياۋ جۇرگىنشىلەر كوپىرىنىڭ قۇرىلىسى. «استانا» شاعىن اۋدانى مەن پرەزيدەنت ساياباعىن جالعايتىن، قالامىزدىڭ جاڭا ساۋلەتتىك كەلبەتىن ايشىقتايتىن ماڭىزدى ينفراقۇرىلىمدىق جوبا نۇرلىبەك ماشبەكۇلىنىڭ باستاماسى بولاتىن.
«جاڭا كوپىر قۇرىلىسىن تاجىريبەسى مول «الەم قۇرىلىس» كومپانياسى جۇرگىزەدى. ۇزىندىعى – 319,4 مەتر، ەنى – 12 مەتر، جالپى قۇنى 13 ملرد تەڭگەگە جۋىقتايدى. ەنى 3 مەتر جاياۋ جۇرگىنشىلەر جولى جانە كوپىر بويىندا ارقايسىسىنىڭ ەنى ءبىر جارىم مەتر بولاتىن ەكى ۆەلوجولاق سالىنادى.
بيىل قىزىلوردا قالاسىنىڭ جول-كولىك ينفراقۇرىلىمىن دامىتۋ ءۇشىن 38 ملرد. تەڭگەنىڭ 23 جوباسى ىسكە اسىرىلۋدا، 71 كوشە كۇردەلى جوندەۋدەن، قايتا جاڭعىرتۋدان ءوتىپ جاتىر. ماسەلەن، «بايتەرەك» تۇرعىن اۋدانىنداعى وڭتۇستىك ماگيسترالدى كانال ارقىلى وتەتىن جاڭا كوپىر قۇرىلىسى تولىق بىتكەندە، كولىك قاتىناسى رەتتەلەدى.
تورايعىروۆ كوشەسىنەن «قىزىلوردا-قۇمكول» اۆتوجولىنا دەيىنگى ساعىمباەۆ كوشەسىندەگى قايتا جاڭعىرتۋ جۇمىستارى دا اياقتالۋعا جاقىن. وسىلايشا، جاڭا كوپىر مەن جاڭارتىلعان ساعىمباەۆ كوشەسى «باتىس ەۋروپا-باتىس قىتاي» حالىقارالىق ءدالىزى مەن استانا قالاسىنان كەلەتىن جولدى تۇيىستىرەتىن ۇلكەن ءارى زاماناۋي قاقپاعا اينالادى.
بۇدان بولەك، نازارباەۆ داڭعىلى مەن نەگىزگى كوشەلەر قايتا جاڭعىرتىلدى. تاسبوگەت كەنتىندەگى يمانوۆ، بوزعۇل-1, ناۋرىز، ەسەنوۆ كوشەلەرى كەڭەيدى.
بۇل يگىلىكتەر پرەزيدەنتىمىز بەن ۇكىمەتتىڭ قولداۋىنىڭ ارقاسىندا جۇزەگە اسۋدا. بارشاڭىزدىڭ ەل دامۋى، تۇرعىندارىمىزدىڭ جايلى تۇرمىسى مەن وسكەلەڭ ۇرپاقتىڭ جارقىن بولاشاعى جولىنداعى ورەلى جۇمىستارىڭىزعا ساتتىلىك تىلەيمىن!»، – دەدى مۇرات نالقوجاۇلى.
بۇگىندە ءوڭىردى دامىتۋداعى ىلكىمدى ىستەر جۇيەلى جۇزەگە اسىرىلۋدا.
مەملەكەت باسشىسىنىڭ «تازا قازاقستان» باعدارلاماسى اياسىندا پرەزيدەنت ساياباعى جاڭا كەيىپكە ەندى. وسى اۋماققا كەلۋشىلەردىڭ قاۋىپسىزدىگى مەن جايلىلىعى ءۇشىن اۆتوجول جانە اۆتوتۇراق سالىندى.
سىرداريا وزەنىنىڭ قورعانىس بوگەتتەرىن نىعايتۋ جۇمىستارى دا قارقىن الدى. داريا جاعالاۋىنا ەكى جولاقتى جاياۋ جۇرگىنشى جانە ۆەلوسيپەد جولدارى تۇسۋدە.
ساياباقتى جالعايتىن توعىز قاباتتى 15 تۇرعىن ءۇي كەشەنى جاقىن ارادا پايدالانۋعا بەرىلەدى. تۇرعىن ءۇي كەشەنىنىڭ جانىنان بەس جۇلدىزدى جانە «يبيس» قوناق ۇيلەرى، 200 ورىندىق پەريناتالدىق ورتالىق بوي كوتەرىپ كەلەدى.
مەملەكەت باسشىسىنىڭ تاپسىرماسىنا سايكەس پرەزيدەنتتىك كىتاپحانا مەن دراما تەاتردىڭ ىرگەتاسى قالانىپ، قۇرىلىسى جۇرگىزىلۋدە.
