يراننىڭ پراگاداعى ەلشىسى «راديو فاردا» راديوستانتسياسىنا قاتىستى تەگەران تاراپىنان ايتىلعان مالىمدەمەلەردەن كەيىن چەحيا سىرتقى ىستەر مينيسترلىگىنە شاقىرىلدى. بۇل تۋرالى چەحيانىڭ CTK اقپارات اگەنتتىگى ەلدىڭ سىرتقى ىستەر ءمينيسترى پەتر ماتسينكانىڭ سوزىنە سىلتەمە جاساپ حابارلادى، دەپ جازدى "ادىرنا".
بۇعان دەيىن يران قارۋلى كۇشتەرىنىڭ وكىلى ابولفازل شەكارچي بىرقاتار بۇقارالىق اقپارات قۇرالدارىن اقش پەن ءيزرايلدىڭ مۇددەسىنە جۇمىس ىستەيدى دەپ ايىپتاعان. ونىڭ سوزىنشە، ولاردىڭ قاتارىندا پارسى تىلىندەگى «راديو فاردا» دا بار.
شەكارچي اتالعان اقپارات قۇرالدارى يران ءۇشىن ىقتيمال نىساندار تىزىمىنە ەنگىزىلۋى مۇمكىن ەكەنىن مالىمدەگەن.
وسى مالىمدەمەدەن كەيىن چەحيا بيلىگى يران ەلشىسىن تۇسىنىكتەمە بەرۋ ءۇشىن سىرتقى ىستەر مينيسترلىگىنە شاقىردى. كەزدەسۋ جاقىن ارادا تاياۋ شىعىس دەپارتامەنتىنىڭ ديرەكتورى دەڭگەيىندە وتەدى دەپ جوسپارلانىپ وتىر.
«راديو فاردا» – پارسى تىلىندە حابار تاراتاتىن راديوستانتسيا. ول پراگادا ورنالاسقان امەريكالىق «ازات ەۋروپا/ازاتتىق راديوسى» (RFE/RL) حولدينگىنىڭ باسقارۋىمەن جۇمىس ىستەيدى.
راديوستانتسيا اقش قارجىلاندىراتىن «ازاتتىق راديوسى» قۇرىلىمىنا كىرەدى جانە يران اۋديتورياسىنا ارنالعان جاڭالىقتار مەن اقپاراتتىق باعدارلامالار تاراتادى.
چەحيا تاراپىنىڭ يران ەلشىسىن شاقىرۋى تەگەراننىڭ راديوستانتسياعا قاتىستى ايتقان ەسكەرتۋلەرىنە بايلانىستى ديپلوماتيالىق الاڭداۋشىلىقتىڭ بەلگىسى رەتىندە قاراستىرىلىپ وتىر.
