چەحياداعى جارىلىستى رەسەيدىڭ بارلاۋ قىزمەتى ۇيىمداستىرعان

16257
Adyrna.kz Telegram
چەحيا رەسەيدەن «سپۋتنيك V» ۆاكتسيناسىن ساتىپ العالى وتىر ەدى. اراداعى كەلىسىم شارت ءۇزىلدى. چەحيانىڭ پرەمەر-ءمينيسترى اندرەي بابيش ەلىنەن رەسەيدىڭ 18 ديپلوماتىن شىعارۋعا شەشىم جاسادى. بۇعان سەبەپ بولعان، 7 جىل بۇرىن چەحيانىڭ ۆربەتيتسە قالاسىنداعى وق-ءدارى قويماسىنداعى جارىلىستى رەسەيدىڭ بارلاۋ قىزمەتى ۇيىمداستىرعانى انىقتالدى.
سوعان قاتىستى چەح بيلىگى رەسەيلىك ازاماتتار الەكساندر پەتروۆ پەن رۋسلان بوشيروۆ ەكەۋىنە حالىقارالىق ىزدەۋ سالعان. ماسكەۋ ءوز ازاماتتارىنىڭ وسى ىسكە قاتىسى بارىن بىلە تۇرسا دا، ەشقانداي شارا قولدانباعان. بۇگىن چەح وكىمەتى باسشىسى رەسەيمەن ديپلوماتيالىق قارىم-قاتىناستى توقتاتۋعا شەشىم جاسادى.
چەح وكىمەتى 48 ساعاتتىڭ ىشىندە، ياعني ەكى تاۋلىكتە رەسەيلىك ديپلوماتتارعا ەلدەن شىعىپ كەتۋدى بۇيىرىپ وتىر. چەحيانىڭ وق-ءدارى قويماسىنداعى جارىلىس رەسەيدىڭ بارلاۋ قىزمەتىنىڭ تىكەلەي قاتىسۋىمەن ىسكە اسقانىن چەحيانىڭ ارنايى تەكسەرۋ ورىندارى انىقتاعانىن اندرەي بابيش مالىمدەدى.
جارىلىستان ەكى ادام قايتىس بولىپ، ماڭايىنداعى ەلدى مەكەندەر ەۆاكۋاتسيالانعان. جارىلىس چەحيانىڭ ۆربەتيتسە قالاسىنداعى وق-ءدارى قويماسىندا وسىدان 7 جىل بۇرىن بولعان.
وسى جارىلىستاردى جاساعان رەسەيلىك الەكساندر پەتروۆ پەن رۋسلان بوشيروۆ ەكەۋىنە ۇلىبريتانيادا دا سەرگەي سكريپال مەن ونىڭ قىزى يۋليانى ۋلاپ كەتكەن دەگەن ايىپ تاعىلعان.
بەكبولات قارجان،
"ادىرنا" ۇلتتىق پورتالى 
پىكىرلەر