يران بيلىگى ەلدەگى ينتەرنەت-رەسۋرستارعا قويىلعان شەكتەۋلەردى جويۋ ماسەلەسىن كوتەردى، دەپ حابارلايدى "ادىرنا" ءتىلشىسى ريا-عا سىلتەپ.
بۇل تۋرالى يراننىڭ ءبىرىنشى ۆيتسە-پرەزيدەنتى مۇحامماد-رەزا ارەف حابارلاعان.
ارەفتىڭ ايتۋىنشا، يران پرەزيدەنتى ماسۋد پەزەشكيان ينتەرنەتتەگى بۇعاتتاۋلارعا قاتىستى ماسەلەنى شەشۋ تۋرالى شەشىم قابىلداعان.
«پرەزيدەنت بۇعاتتاۋلارعا قاتىستى ماسەلە شەشىلۋى كەرەك دەگەن شەشىم قابىلدادى. الايدا ءارتۇرلى ۇيىمدار مەن قۇقىقتىق ينستانتسيالارعا بايلانىستى بۇل پروتسەسس ۋاقىت الادى. دەگەنمەن بىرتىندەپ بۇعاتتاۋلار ماسەلەسى شەشىلەدى»، – دەدى ۆيتسە-پرەزيدەنت. ول ينتەرنەتتەگى شەكتەۋلەر ەلدىڭ قاۋىپسىزدىگىنە قاۋىپ توندىرەتىن ارەكەتتەرگە قارسى تۇرۋ قاجەتتىلىگىمەن بايلانىستى ەكەنىن اتاپ ءوتتى. الايدا ارەفتىڭ پىكىرىنشە، ينتەرنەتتى جاپپاي بۇعاتتاۋ كۇتكەن ناتيجەنى بەرمەي وتىر.
ۆيتسە-پرەزيدەنتتىڭ ايتۋىنشا، شەكتەۋلەردىڭ ەنگىزىلۋى ازاماتتاردىڭ بۇعاتتاۋلاردى اينالىپ وتۋگە ارنالعان ءتۇرلى قۇرالداردى جاپپاي پايدالانۋىنا اكەلگەن. ونىڭ پىكىرىنشە، بۇل جاعدايدىڭ ءوزى ەل قاۋىپسىزدىگىنە قوسىمشا قاۋىپ ءتوندىرۋى مۇمكىن.
«ۋنيۆەرسيتەت وقىتۋشىسى رەتىندە مەن بۇعاتتاۋلاردىڭ ەلگە قانداي پايدا اكەلەتىنىن تۇسىنبەيمىن»، – دەدى مۇحامماد-رەزا ارەف.
يراندا بىرقاتار تانىمال الەۋمەتتىك جەلى مەن ينتەرنەت پلاتفورمالارىنا ۇزاق ۋاقىتتان بەرى شەكتەۋ قويىلعان.
2025 جىلدىڭ سوڭىندا، ەلدەگى اۋقىمدى نارازىلىقتار مەن اقش-پەن قاقتىعىسقا بايلانىستى ينتەرنەتكە ەنگىزىلگەن جاڭا شەكتەۋلەرگە دەيىن، يران بيلىگى Telegram, YouTube جانە Instagram سياقتى پلاتفورمالارعا قولجەتىمدىلىكتى قالپىنا كەلتىرۋ ماسەلەسىن قاراستىرىپ جاتقانى حابارلانعان. Telegram يراندا 2018 جىلدىڭ ساۋىرىندە سوت شەشىمىمەن بۇعاتتالعان. ال Facebook پەن Twitter 2009 جىلى پرەزيدەنت سايلاۋىنا بايلانىستى نارازىلىقتار كەزىندە شەكتەلدى. Instagram مەن WhatsApp-قا قولجەتىمدىلىك 2022 جىلى ماحسا ءامينيدىڭ پوليتسيا قاماۋىنان كەيىن قايتىس بولۋىنا بايلانىستى باستالعان نارازىلىقتار كەزىندە شەكتەلگەن. كەيىن WhatsApp قايتا قولجەتىمدى بولدى.
