وزبەكستان پرەزيدەنتى شاۆكات ميرزيوەۆ پەن ازەربايجان پرەزيدەنتى يلحام اليەۆ جۇبايلارىمەن بىرگە بۇحاراعا باردى، دەپ حابارلايدى “ادىرنا”.
ولار 24 تامىزدا بۇحارانىڭ تاريحي-مادەني نىساندارىن ارالادى. بۇل تۋرالى وزبەكستان پرەزيدەنتىنىڭ ءباسپاسوز قىزمەتى حابارلادى.
مەملەكەت باسشىلارى سامانيلەر كەسەنەسى، ارك قامالى، پوي-كالون جانە ليابي-حاۋز ساۋلەت انسامبلدەرى، سونداي-اق كوكىلداش مەدرەسەسىنە باردى.
ساپار سامانيلەر كەسەنەسىنەن باستالدى. يسمايل ساماني سالدىرعان بۇل تاريحي نىسان سامانيلەر اۋلەتىنىڭ وتباسىلىق مازارى رەتىندە تۇرعىزىلعان. كەسەنە 1993 جىلى يۋنەسكو-نىڭ دۇنيەجۇزىلىك مۇرالار تىزىمىنە ەنگىزىلگەن.
بۇدان كەيىن پرەزيدەنتتەر بىرنەشە عاسىر بويى بۇحارانىڭ ساياسي جانە اكىمشىلىك ورتالىعى بولعان ارك قامالىن تاماشالادى.
مەملەكەت باسشىلارى پوي-كالون ساۋلەت انسامبلىمەن دە تانىستى. ورتالىق ازياداعى ەڭ تانىمال تاريحي كەشەندەردىڭ ءبىرى سانالاتىن ءانسامبلدىڭ باستى نىسانى – 1127 جىلى تۇرعىزىلعان كالون مۇناراسى. كەشەن قۇرامىندا XVI عاسىردىڭ باسىندا سالىنعان كالون مەشىتى مەن مير-اراب مەدرەسەسى بار.
ساپار بارىسىندا ليابي-حاۋز ءانسامبلى دە تانىستىرىلدى. كونە بۇحارانىڭ ورتالىعىنداعى تاريحي سۋ قويماسىنىڭ اينالاسىندا قالىپتاسقان بۇل ورىن قالانىڭ ەڭ تانىمال قوعامدىق كەڭىستىكتەرىنىڭ ءبىرى سانالادى. انسامبل قۇرامىنا كوكىلداش مەدرەسەسى، حاناكا جانە نادير ديۆانبەگي مەدرەسەسى كىرەدى.
سونداي-اق ازەربايجان پرەزيدەنتى مەن ونىڭ جۇبايىنا ۇلتتىق قولونەر بۇيىمدارى تانىستىرىلىپ، بۇحارا قالاسىنىڭ تاريحى تۋرالى اقپارات بەرىلدى.
