اۋعانستان مەن قاراقالپاقستان قۇنى 100 ملن دوللاردان اساتىن 13 ساۋدا كەلىسىمىنە قول قويدى، دەپ حابارلايدى “ادىرنا” ۇلتتىق پورتالى فەرعاناعا سىلتەپ.
كەلىسىمگە قول قويۋ ءراسىمى كابۋلدا 2026 جىلدىڭ 10 مامىرىندا وتكەن. ءىس-شاراعا قاراقالپاقستان رەسپۋبليكاسى پارلامەنتىنىڭ توراعاسى امانباي ورىنباەۆ جانە اۋعانستاننىڭ ونەركاسىپ جانە ساۋدا ءمينيسترىنىڭ مىندەتىن اتقارۋشى نۋرۋددين ازيزي قاتىستى.
تاراپتار 13 باعىت بويىنشا ىنتىماقتاستىق تۋرالى ۋاعدالاسقان. اتاپ ايتقاندا، اۋعانستاندا ۇن تارتۋ زاۋىتىن سالۋ، قاراقالپاقستاننان ۇن، تسەمەنت، مۇناي جانە ماكارون ونىمدەرىن يمپورتتاۋ، اۋعانستاننىڭ بالح پروۆينتسياسىنان جاڭا پىسكەن جەمىس-جيدەك، كوكونىس، انار مەن جۇگەرى ەكسپورتتاۋ كوزدەلگەن.
سونداي-اق 2026 جىلدىڭ ناۋرىزىندا كابۋلدا وتكەن كونفەرەنتسيا بارىسىندا 514,8 ملن دوللار كولەمىندە مەموراندۋمدارعا قول قويىلسا، ءساۋىر ايىندا تاعى 520 ملن دوللارلىق كەلىسىمدەر جاسالعان.
ايتا كەتەيىك، كەلىسىمدەر اۋعانستان مەن قاراقالپاقستان اراسىندا جاسالعان. ال تاشكەنتتەگى Uzdaily باسىلىمى جاڭالىقتى «اۋعانستان مەن وزبەكستان اراسىنداعى كەلىسىم» رەتىندە جاريالاعان جالعىز وزبەك باسىلىمى بولدى.
