قازاقستان مەن رەسەي ازاماتتارى مىنگەن قايىق پحۋكەت پروۆينتسياسىندا مايتون ارالىندا جارىلىپ، ورتكە ورانعان. بۇل تۋرالى Bangkok post جازدى، دەپ حابارلايدى “ادىرنا” ۇلتتىق پورتالى.
پحۋكەت ايماقتىق پورت ءوفيسىنىڭ ديرەكتورى ناچاپونگ ءپرانيدتىڭ مالىمەتتەرى بويىنشا، قوزعالتقىشتا اقاۋ پايدا بولىپ، سودان كەيىن قايىق ورتكە ورانىپ، جارىلعان. وقيعا جەرگىلىكتى ۋاقىت بويىنشا شامامەن 09:00-دە بولدى.
سول ۋاقىتتا تەك ءۇش ەكيپاج مۇشەسى بولعان: كاپيتان، ينجەنەر جانە ءبىر جۇمىسشى. ۇشەۋى دە كۇيىك جاراقاتتارى مەن جارىلىس قيراتۋلارىنان زاقىمداندى. سونداي-اق، ءۇش تۋريست پەن گيد ۇشقان ۇشقىنداردان زارداپ شەكتى. زارداپ شەككەندەر جەرگىلىكتى اۋرۋحاناعا جەتكىزىلدى.
Khaosod English پورتالىنىڭ مالىمەتى بويىنشا، كاتەر قازاقستاندىق جانە رەسەيلىك تۋريستەردى تاسىمالداپ جاتقان. كەمە بورتىندا بارلىعى 37 ادام بولعان، ونىڭ ىشىندە 33 رەسەيلىك جانە قازاقستاندىق تۋريست، ءبىر گيد جانە ءۇش ەكيپاج مۇشەسى.
"كاپيتان مەن ەكيپاجدىڭ ءبىر مۇشەسى كۇيىك الدى. ءۇش تۋريست پەن گيد جارىلىس قيراتۋلارىنان جاراقاتتاندى", - دەپ قوستى ناچاپونگ.
پحۋكەت وبلىسى ءورت ءسوندىرۋ قايىعىن جانە ءورتتى سوندىرۋگە قوسىمشا ءبىر قايىقتى جىبەردى. Thana Marine 555 قايىعى تولىعىمەن وتقا وراندى.
تايلاندتىڭ تۋريزم جانە سپورت ءمينيسترى سوراۆونگ تحيەنتحونگ تۋريستىك پوليتسيا مەن جەرگىلىكتى قىزمەتتەرگە تۋريستەرگە تولىق كومەك كورسەتۋ، قاۋىپسىزدىكتى قامتاماسىز ەتۋ، ساپارلاردى ۇيىمداستىرۋ جانە زارداپ شەككەندەرگە مەديتسينالىق كومەك كورسەتۋ بويىنشا تاپسىرما بەردى.
