ايزەرە جەڭىسحانوۆا رەسپۋبليكالىق جانە حالىقارالىق ءبىلىم دودالارىندا بىرنەشە رەت جۇلدەگە يە بولىپ، بيىل تاشكەنتتە وتكەن حالىقارالىق حيميا وليمپياداسىنىڭ (IChO) التىن مەدال يەگەرى اتاندى. 24 تامىزدا مەملەكەت باسشىسى قاسىم-جومارت توقاەۆپەن كەزدەسكەن جاس وليمپياداشى «ادىرنا» تىلشىسىنە اقورداداعى ەرەكشە ءساتى مەن جەتىستىككە جەتۋ جولى تۋرالى ايتىپ بەردى.
قازاقستاندىق وقۋشىلار حالىقارالىق وليمپيادالاردا جوعارى ناتيجە كورسەتىپ، ەل نامىسىن ابىرويمەن قورعاپ ءجۇر. سولاردىڭ قاتارىندا شىعىس قازاقستان وبلىسىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى ايزەرە جەڭىسحانوۆا دا بار.
جاس دارىن اقورداداعى جۇزدەاۋ ومىرىندەگى ەڭ ەرەكشە وقيعالاردىڭ بىرىنە اينالعانىن جەتكىزدى.
«شىنىمدى ايتسام، باستاپقىدا اقورداعا بارىپ، پرەزيدەنتپەن كەزدەسەمىن دەپ ويلاعان جوقپىن. مەنىڭ باستى ماقساتىم – وليمپيادادا جاقسى ناتيجە كورسەتۋ بولاتىن. ال اقورداعا شاقىرۋ الىپ، ءسوز سويلەيتىنىمدى بىلگەنىمدە قاتتى قۋاندىم ءارى ازداپ قوبالجىدىم. پرەزيدەنت رەزيدەنتسياسىن ىشىنەن كورگەندە قاتتى تاڭعالدىم. وسىنداي باقىتتىڭ ماعان بۇيىرعانىنا قۋانىشتىمىن»، - دەيدى ول.
ايزەرەنىڭ عىلىم جولىنداعى جەتىستىكتەرى ەرتە جاستان باستالعان. ول 8 سىنىپتان باستاپ حيميا پانىنە ەرەكشە قىزىعۋشىلىق تانىتقان. 2023 جىلى رەسپۋبليكالىق يۋنيورلار وليمپياداسىندا كۇمىس جۇلدەگەر اتانعان. كەيىنگى جىلدارى رەسپۋبليكالىق وليمپيادالاردىڭ بىرنەشە دۇركىن التىن جۇلدەگەرى بولعان. سونداي-اق رۋمىنيادا وتكەن IJSO وليمپياداسىنىڭ كۇمىس جۇلدەسىن، برازيليادا بولعان حالىقارالىق مەندەلەەۆ وليمپياداسىنىڭ قولا مەدالىن، ال 2026 جىلى ماسكەۋدە وتكەن مەندەلەەۆ وليمپياداسىنىڭ كۇمىس مەدالىن جانە تاشكەنتتەگى حالىقارالىق حيميا وليمپياداسىنىڭ التىن مەدالىن يەلەنگەن.
جاس حيميك ءوزىنىڭ ءاربىر جەتىستىگىنىڭ ارتىندا اتا-اناسى مەن ۇستازدارىنىڭ ەڭبەگى تۇرعانىن ەرەكشە اتاپ ءوتتى.
«اتا-انام ماعان ارقاشان سەنىم ارتتى. جەڭىلىس بولعان ساتتەردە دە قولداۋ كورسەتىپ، جىگەرلەندىرىپ وتىردى. ال ۇستازدارىم پانگە دەگەن قىزىعۋشىلىعىمدى ارتتىرىپ، وليمپيادالىق ەسەپتەردى تالداۋعا كوپ كۇش سالدى. مەنىڭ جەڭىسىمنىڭ ارتىندا ۇستازدارىمنىڭ ەڭبەگى مەن اتا-انامنىڭ سەنىمى بار»، -دەيدى ايزەرە.
ايتۋىنشا، حالىقارالىق وليمپياداعا دەيىنگى جول بىرنەشە جىلعا سوزىلاتىن كۇردەلى دايىندىق كەزەڭىنەن تۇرادى.
«حالىقارالىق وليمپياداعا ءوتۋ جانە وعان دايىندالۋ – بىرنەشە قادامنان تۇراتىن جۇيە. ونىڭ ءبارى شامامەن 7–8-سىنىپتاردان باستالادى. مەنىڭ ويىمشا، تەوريالىق اقپاراتتى مەڭگەرۋ پراكتيكالىق بولىمنەن الدەقايدا قيىنىراق بولدى. سوندىقتان وليمپياداعا دايىندىق بارىسىندا باس نازارىمدى تەورياعا قويامىن. قازاقستاندا وليمپيادالىق قوزعالىستاعى باسەكەلەستىك وتە جوعارى. جارىس كەزىندە قوبالجۋدى جەڭۋگە كوماندا ىشىندەگى تيمبيلدينگ شارالارى مەن تالىمگەرلەردىڭ قولداۋى كوپ كومەكتەسەدى»،- دەيدى ول.
ايزەرەنىڭ پىكىرىنشە، وليمپيادالارداعى ەڭ ۇلكەن قيىندىق – تاپسىرمالاردى الدىن الا بولجاۋدىڭ مۇمكىن ەمەستىگى.
«وليمپيادادا قانداي تاقىرىپتار مەن ەسەپتەردىڭ كەلەتىنىن ناقتى بىلە المايسىڭ. سەبەبى فورمات پەن تاقىرىپتار جىل سايىن وزگەرىپ وتىرادى. ءداستۇرلى تۇردە قىتاي، اقش جانە رەسەي قۇرامالارى مىقتى باسەكەلەستىك كورسەتەدى. سوڭعى جىلدارى وزبەكستان قۇراماسى دا جوعارى ناتيجە كورسەتىپ كەلەدى»،- دەيدى وليمپياداشى.
جاس دارىن بولاشاعىن عىلىممەن بايلانىستىرىپ وتىر.
«وسى عىلىم سالاسىمەن اينالىسقىم كەلەدى. اسىرەسە، بۇگىنگى ەكولوگيالىق ماسەلەلەردى شەشۋگە ءوز ۇلەسىمدى قوسامىن دەپ ۇمىتتەنەمىن. بولاشاقتا حيميا سالاسى بويىنشا وقۋىمدى گونكونگتا، اقش-تا نەمەسە قازاقستاندا جالعاستىرماق ويىم بار»، - دەيدى ول.
ايزەرە جەڭىسحانوۆانىڭ جەتىستىكتەرى – تاباندىلىقتىڭ، جۇيەلى دايىندىقتىڭ جانە بىلىمگە دەگەن قۇشتارلىقتىڭ ناتيجەسى. اقوردا تورىندە ءسوز سويلەگەن جاس دارىن بۇگىندە قازاقستاننىڭ عانا ەمەس، حالىقارالىق عىلىمي وليمپيادالارداعى ۇزدىك وقۋشىلاردىڭ قاتارىنا قوسىلىپ وتىر.
ەسكە سالايىق، كەشە پرەزيدەنت قاسىم-جومارت توقاەۆ حالىقارالىق ءپان وليمپيادالارىندا جەڭىمپاز اتانىپ، جۇلدەلى ورىندارعا يە بولعان وقۋشىلارمەن جانە ستۋدەنتتەرمەن كەزدەسكەن ەدى. سالتاناتتى ءىس-شاراعا 21 لاۋرەات، سونداي-اق ولاردىڭ ۇستازدارى مەن تالىمگەرلەرى قاتىستى.
اڭگىمەلەسكەن ديانا اسان
