ۋكراينالىق سكەلەتونشى ۆلاديسلاۆ گەراسكەۆيچ يتاليادا ءوتىپ جاتقان وليمپيادا ويىندارىندا العاشقى جارىس الدىندا شەتتەتىلدى، دەپ حابارلايدى “ادىرنا” ۇلتتىق پورتالى.
بۇعان ونىڭ قازا تاپقان ۋكراينالىق سپورتشىلاردىڭ پورترەتى بەينەلەنگەن شلەممەن ونەر كورسەتكىسى كەلگەنى سەبەپ بولعانى تۋرالى اقپارات تارادى.
سپورتشى وليمپياداعا ۋكراينا قۇراماسىنىڭ كوشباسشىسى رەتىندە كەلگەن.
ول سوعىس كەزىندە قازا تاپقان ۋكراينالىق سپورتشىلاردىڭ بەينەسى سالىنعان سپورتتىق دۋلىعامەن جارىسقا قاتىسۋدى جوسپارلاعان. ول اتالعان شلەممەن رەسمي جاتتىعۋعا دا شىققان. الايدا كەيىن حالىقارالىق وليمپيادا كوميتەتى (حوك) وعان جارىس بارىسىندا بۇل دۋلىعانى پايدالانۋعا بولمايتىنىن ەسكەرتىپ، ءتىپتى جارىسقا قاتىسپاي قالۋى مۇمكىن ەكەنىن حابارلاعان.
دەگەنمەن، گەراسكەۆيچ ءوز شەشىمىنەن باس تارتپاعان. بۇل تۋرالى ول 10 اقپاندا الەۋمەتتىك جەلىدەگى پاراقشاسىندا جازدى.
ۋكراينا پرەزيدەنتى ۆلاديمير زەلەنسكي دە سپورتشىنى قولداپ، دۋلىعادا رەسەي ارەكەتى سالدارىنان قازا تاپقان ۋكراينالىق سپورتشىلاردىڭ پورترەتتەرى بەينەلەنگەنىن اتاپ ءوتتى.
"وليمپيادادا ولار «بەيتاراپ» تۋ استىندا بولسا دا، ومىردە اشىق تۇردە رەسەيدىڭ ۋكرايناعا قارسى اگرەسسياسىن جانە ءبىزدىڭ اۋماقتارىمىزدى وككۋپاتسيالاۋىن قولدايدى", — دەدى زەلەنسكي.
12 اقپاندا حوك پەن حالىقارالىق بوبسلەي جانە سكەلەتون فەدەراتسياسى (IBSF) جارىس كەزىندە ونداي شلەمدى تاعۋعا رۇقسات بەرىلمەيتىنىن رەسمي مالىمدەدى. وسى شەشىمنەن كەيىن گەراسكەۆيچ جارىسقا قاتىسۋشىلار تىزىمىنەن شىعارىلدى.
ءوز كەزەگىندە گەراسكەۆيچ حوك شەشىمىنەن كەيىن «ۋكراينا مۇددەسىن جانە قازا تاپقان سپورتشىلاردىڭ ەستەلىگىن قورعاعانى ءۇشىن ابىروي جولىندا قۇن وتەگەنىن» مالىمدەدى.
ء«بىز ەشقانداي ەرەجەنى بۇزعان جوقپىز جانە وسى وليمپيادادا بۇعان دەيىن وسىنداي ارەكەت جاساعان باسقا سپورتشىلار سياقتى بۇل دۋلىعامەن ونەر كورسەتۋگە تولىق قۇقىلى ەدىك»، — دەدى ول.
