قازاقستان قۇراماسى تاشكەنتتە وتكەن حالىقارالىق حيميا وليمپياداسىندا جوعارى ناتيجە كورسەتىپ، ءتورت مەدال يەلەندى، دەپ حابارلايدى "ادىرنا" ءتىلشىسى.
بۇل تۋرالى وقۋ-اعارتۋ مينيسترلىگى حابارلادى.
بيىلعى ءبىلىم بايگەسىنە الەمنىڭ 90-نان استام ەلىنەن 350-دەن استام دارىندى وقۋشى قاتىستى. قازاقستاننىڭ ۇلتتىق قۇراماسى 100 پايىزدىق ناتيجە كورسەتىپ، كوماندانىڭ بارلىق ءتورت مۇشەسى جۇلدەگەر اتاندى. قورجىنعا ءبىر التىن جانە ءۇش كۇمىس مەدال ءتۇستى.
التىن مەدالدى وسكەمەن قالاسىنداعى نازارباەۆ زياتكەرلىك مەكتەبىنىڭ 11-سىنىپ وقۋشىسى ايزەرە جەڭىسحانوۆا جەڭىپ الدى.
كۇمىس جۇلدەنى الماتى قالاسىنداعى №134 ليتسەيدىڭ وقۋشىسى دانيل پولەتاەۆ، استاناداعى نازارباەۆ زياتكەرلىك مەكتەبىنىڭ وقۋشىسى ءابىلمانسۇر قالي جانە Spectrum International School مەكتەبىنىڭ وقۋشىسى اڭسار جاقسىلىقوۆ يەلەندى.
وليمپيادا بارىسىندا قاتىسۋشىلار بەس ساعاتقا سوزىلعان تەوريالىق جانە پراكتيكالىق كەزەڭدەردە كۇردەلى حيميالىق ەسەپتەردى شىعارىپ، زەرتحانالىق جۇمىستاردى ورىندادى.
