قازاقستان رەسپۋبليكاسىنىڭ ەڭبەك كودەكسىندە ماۋسىمدىق جۇمىسكەرلەرمەن ەڭبەك قاتىناستارىنىڭ بىرقاتار ەرەكشەلىكتەرى بەلگىلەنگەن. بۇل تۋرالى ماۋسىمدىق جانە ۋاقىتشا جۇمىسكەرلەردىڭ ەڭبەك قۇقىقتارىنا ارنالعان بريفينگتە قر ەڭبەك جانە حالىقتى الەۋمەتتىك قورعاۋ مينيسترلىگىنىڭ مەملەكەتتىك ەڭبەك ينسپەكتسياسى كوميتەتىنىڭ اقمولا وبلىسى بويىنشا دەپارتامەنتى باسشىسىنىڭ ورىنباسارى ۋاقىت بەيسەمباەۆ ايتتى.
ونىڭ ايتۋىنشا، كليماتتىق نەمەسە وزگە دە تابيعي جاعدايلارعا بايلانىستى بەلگىلى ءبىر كەزەڭدە ورىندالاتىن، بىراق ءبىر جىلدان اسپايتىن جۇمىستار ماۋسىمدىق جۇمىستار بولىپ سانالادى. ەڭبەك شارتىندا جۇمىستىڭ ماۋسىمدىق سيپاتى مەن ونى ورىنداۋ مەرزىمى مىندەتتى تۇردە كورسەتىلۋى ءتيىس.
مۇنداي جۇمىسكەرلەر ءۇشىن ماڭىزدى كەپىلدىكتەردىڭ ءبىرى – سىناق مەرزىمىنىڭ بەلگىلەنبەيتىندىگى. سونىمەن قاتار جۇمىس بەرۋشى زاڭدا كوزدەلگەن جەكەلەگەن جاعدايلاردا، ونىڭ ىشىندە وندىرىستىك سەبەپتەرگە بايلانىستى جۇمىستىڭ ەكى اپتادان استام ۋاقىتقا توقتاتىلۋى نەمەسە جۇمىسكەردىڭ ۇزاق ۋاقىت بويى ۋاقىتشا ەڭبەككە جارامسىز بولۋى جاعدايىندا ەڭبەك شارتىن بۇزا الادى.
«ماۋسىمدىق جۇمىسكەردىڭ دە ەڭبەك شارتىن ءوز باستاماسىمەن بۇزۋعا قۇقىعى بار. ول ءۇشىن جۇمىس بەرۋشىگە جەتى كۇنتىزبەلىك كۇن بۇرىن جازباشا تۇردە حابارلاۋ قاجەت»، – دەدى ۋاقىت بەيسەمباەۆ.
ەڭبەك شارتىن جەكەلەگەن نەگىزدەر بويىنشا بۇزعان كەزدە جۇمىس بەرۋشى دە جۇمىسكەردى جەتى كۇنتىزبەلىك كۇن بۇرىن جازباشا تۇردە حاباردار ەتۋگە مىندەتتى.
وسىلايشا، ماۋسىمدىق جۇمىستىڭ وزىندىك ەرەكشەلىكتەرى بولعانىمەن، جۇمىسكەرلەر نەگىزگى ەڭبەك كەپىلدىكتەرىن ساقتايدى. ال ەڭبەك شارتىن جاساسۋ جانە توقتاتۋ ءتارتىبى قولدانىستاعى زاڭناما تالاپتارىنا سايكەس بولۋى ءتيىس.
