ەكس-دەپۋتات باقىتجان بازاربەك جامبىل وبلىسىنىڭ قۇلان اۋىلىنا كوشىپ باردى. بۇل تۋرالى ول Facebook پاراقشاسىندا جازدى، دەپ حابارلايدى «ادىرنا» ءتىلشىسى.
ايتۋىنشا، ول جول اپاتىنان زارداپ شەككەن نۇرجىگىت ەسىمدى ازاماتتىڭ جانىندا بولۋ ءۇشىن قونىس اۋدارعان.
«اۋىر حالدە جاتقان نۇرجىگىتتىڭ جانىندا بولۋىم قاجەت بولعاندىقتان، قۇلان اۋىلىنا كوشىپ كەلدىم. الداعى ۋاقىتتا نۇرجىگىت كوزىن اشقانشا وسى اۋىلدا بولامىن»،– دەدى بازاربەك.
ەكس-دەپۋتات قۇلان اۋىلىنداعى ورتالىق مادەنيەت ۇيىندە ورنالاسقان سايلاۋ ۋچاسكەسىندە قۇرىلتاي دەپۋتاتتارىن سايلاۋعا قاتىسقانىن دا ايتتى. ول الماتى قالاسىنىڭ بوستاندىق اۋدانىندا تىركەلگەندىكتەن، داۋىس بەرۋ ءۇشىن ۋاقىتشا تىركەۋگە تۇرىپ، ءتيىستى رۇقسات قۇجاتىن العان.
ەسكە سالايىق، بۇعان دەيىن باقىتجان بازاربەك جول اپاتىنا قاتىستى پىكىر بىلدىرگەن ەدى.
