قازاقستان رەسپۋبليكاسى قۇرىلتايىنىڭ ءبىرىنشى شاقىرىلىمىنىڭ العاشقى سەسسياسى باستالدى. وتىرىسقا مەملەكەت باسشىسى قاسىم-جومارت توقاەۆ قاتىسىپ وتىر. بۇل تۋرالى اقوردا جازدى، دەپ حابارلايدى "ادىرنا".
قاسىم-جومارت توقاەۆ قازاقستان رەسپۋبليكاسى قۇرىلتايىنىڭ ءبىرىنشى شاقىرىلىمىنىڭ ءبىرىنشى سەسسياسىنىڭ اشىلۋىندا ءسوز سويلەدى. پرەزيدەنت جاڭا قۇرىلتايدىڭ جۇمىسىن تاريحي كەزەڭ دەپ اتادى.
توقاەۆتىڭ ايتۋىنشا، بۇگىن قازاقستان حالقى جالپىۇلتتىق رەفەرەندۋمدا قولداعان جاڭا كونستيتۋتسياعا سايكەس ەلىمىزدىڭ ءبىر پالاتالى زاڭ شىعارۋشى ورگانى – قۇرىلتاي رەسمي تۇردە جۇمىسىن باستايدى.
پرەزيدەنت بۇل كۇندى مەملەكەتتىڭ دامۋ جولىنداعى ماڭىزدى كەزەڭ ءارى تاريحي ءسات دەپ باعالادى.
"بۇگىن ەلىمىز ءوزىنىڭ دامۋ جولىندا اسا ماڭىزدى كەزەڭگە اياق باستى. بۇل – مەملەكەتىمىز ءۇشىن ءمان-ماعىناسى ايرىقشا وقيعا، تاريحي ءسات. ءبىز ۇلت جىلناماسىنىڭ جاڭا پاراعىن اشىپ وتىرمىز", – دەدى قاسىم-جومارت توقاەۆ.
مەملەكەت باسشىسى قۇرىلتاي اتاۋىنىڭ قازاق تاريحىندا ايرىقشا ءمانى بولعانىن اتاپ ءوتتى. ونىڭ سوزىنشە، تاريحي كەزەڭدەردە قۇرىلتايدا مەملەكەتتىك ماڭىزى بار ماسەلەلەر تالقىلانىپ، ورتاق شەشىمدەر قابىلدانعان.
توقاەۆ جاڭا ينستيتۋتتىڭ مەملەكەتتىك باسقارۋ جۇيەسىندە ماڭىزدى ءرول اتقاراتىنىن ايتتى.
"سەبەبى قۇرىلتاي بيلىك جۇيەسىن تۇبەگەيلى جاڭعىرتادى، بۇكىل مەملەكەتتىك اپپاراتتىڭ جۇمىسىنا تىڭ سەرپىن بەرەدى. قۇرىلتاي ۇلتتىق زاڭناما ساپاسىن ارتتىرۋ ارقىلى ەلىمىزدىڭ قۇقىقتىق نەگىزىن نىعايتا تۇسەدى", – دەدى پرەزيدەنت.
مەملەكەت باسشىسى بۇل تاريحي ميسسيا قۇرىلتاي دەپۋتاتتارىنا جۇكتەلىپ وتىرعانىن اتاپ ءوتىپ، ءبىرىنشى شاقىرىلىم دەپۋتاتى بولۋ ۇلكەن ابىروي ەكەنىن جەتكىزدى.
"وسى اسا ابىرويلى اتقا ساي لايىقتى قىزمەت ەتەسىزدەر دەپ سەنەمىن", – دەدى قاسىم-جومارت توقاەۆ.
قۇرىلتايدىڭ العاشقى سەسسياسى جاڭا ءبىر پالاتالى پارلامەنتتىڭ جۇمىسىنا باستاۋ بەرەتىن ماڭىزدى ساياسي وقيعا سانالادى.
