ءبىر كوشە – ءبىر تاڭداۋ. شەڭگەلدى اۋىلىنداعى قازاقستان كوشەسىنىڭ 100-دەن استام تۇرعىنى سايلاۋ ۋچاسكەسىنە بىرگە كەلىپ، داۋىس بەردى. ولاردىڭ قاتارىندا بالاباقشا تاربيەشىسى، كوپبالالى انا الفيا دولدانوۆا دا ءوز تاڭداۋىن جاسادى.
«بۇگىن ءبىز بۇكىل كوشە بولىپ، داۋىس بەرۋگە بىرگە كەلدىك. بۇل – ەلىمىزدىڭ بولاشاعىنا بەيجاي قارامايتىنىمىزدىڭ بەلگىسى. بالالارىمىزدىڭ بولاشاعى جارقىن بولىپ، ەلىمىزدە ءاردايىم بەيبىتشىلىك پەن بەرەكە ورناسىن»، – دەدى الفيا دولدانوۆا.
قازاقستان كوشەسىنىڭ تۇرعىندارى ءۇشىن داۋىس بەرۋ ءساتى ەرەكشە كوڭىل كۇيدە ءوتتى. اعا بۋىنمەن قاتار جاستار دا بەلسەندىلىك تانىتىپ، سايلاۋعا جاۋاپكەرشىلىكپەن قارايتىنىن كورسەتتى. ولار داۋىس بەرۋ قورىتىندىسىن دا بۇكىل كوشە بولىپ بىرگە اسىعا كۇتەتىنىن ايتۋدا.
ايتا كەتەيىك، شەڭگەلدى اۋىلدىق وكرۋگىندە 5 361 سايلاۋشى تىركەلگەن. ال الماتى وبلىسىندا بارلىعى 683 سايلاۋ ۋچاسكەسى جۇمىس ىستەيدى. وڭىردەگى 1 042 987 ازاماتتىڭ داۋىس بەرۋگە قۇقىعى بار. ونىڭ ىشىندە كامەلەت جاسىنا تولعان 14 104 ازامات سايلاۋعا العاش رەت قاتىسۋ قۇقىعىنا يە بولدى.
وبلىستاعى بارلىق سايلاۋ ۋچاسكەسى قاجەتتى ماتەريالدىق-تەحنيكالىق قۇرالدارمەن تولىق قامتاماسىز ەتىلگەن. داۋىس بەرۋ بارىسىن حالىقارالىق بايقاۋشىلار باقىلاپ وتىر. ورتالىق سايلاۋ كوميسسياسى 42 شەت مەملەكەت پەن 13 حالىقارالىق ۇيىمنىڭ اتىنان كەلگەن 777 حالىقارالىق بايقاۋشىنى اككرەديتتەدى.
