فوتو: tv24kz_kaz
قازاقستان پرەزيدەنتىنىڭ اكىمشىلىگى باسشىسىنىڭ ءبىرىنشى ورىنباسارى ەرلان قارين قۇرىلتاي دەپۋتاتتارىن سايلاۋدا داۋىس بەردى، دەپ حابارلايدى "ادىرنا".
داۋىس بەرگەننەن كەيىن ول بۇگىنگى ساياسي ناۋقاننىڭ ەل ءۇشىن ماڭىزىنا توقتالدى.
"بۇل سايلاۋ شىن مانىندە قاتارداعى سايلاۋ ەمەس. ارينە، كەز كەلگەن سايلاۋ ناۋقانى ماڭىزدى. بىراق بۇل جولعى سايلاۋدى تاريحي وقيعا دەپ ايتۋعا بولادى. سەبەبى ناۋرىز ايىندا ءبىز جاڭا كونستيتۋتسياعا داۋىس بەردىك. ءبىرىنشى كەزەڭدە جاڭا كونستيتۋتسيا كۇشىنە ەندى. ال بۇگىنگى سايلاۋدىڭ ناتيجەسىندە جاڭا ءبىر پالاتالى پارلامەنت – قۇرىلتايدىڭ قۇرامى انىقتالماق. سوندىقتان بۇل – جاڭا ءداۋىردىڭ باستاۋى", – دەدى ەرلان قارين.
ەرلان قارين سايلاۋدىڭ ماڭىزى تەك مەملەكەتتىك ينستيتۋتتاردىڭ جاڭارۋىمەن شەكتەلمەيتىنىن اتاپ ءوتتى. ونىڭ سوزىنشە، پرەزيدەنت جۇرگىزىپ جاتقان رەفورمالار قوعامدىق-ساياسي ۇدەرىستەرگە دە جاڭا سەرپىن بەرىپ وتىر.
"قوعامدىق كەڭىستىككە جاڭا تۇلعالار، جاڭا كۇشتەر كەلىپ جاتىر. جالپى قوعامدىق ساياساتتىڭ كۇن ءتارتىبى جاڭارۋدا. قازىرگى وزگەرىستەر مەن رەفورمالار اۋقىمى، قارقىنى جانە ديناميكاسى جاعىنان ەلىمىزدەگى سوڭعى ونجىلدىقتارداعى ەڭ ءىرى جاڭعىرۋ ۇدەرىستەرىنىڭ ءبىرى دەپ ايتۋعا بولادى. بۇل وزگەرىستەردىڭ اۋقىمىن تەك قازاقستانمەن عانا ەمەس، تۇتاس ءوڭىر كولەمىندەگى ۇدەرىستەرمەن سالىستىرۋعا بولادى", – دەدى ول.
