ەندى قازاقستانداعى بارلىق مەكتەپ وقۋشىلارى 2024 جىلدىڭ 24 قاڭتارىنان باستاپ الماتى مۇراجايلارىنا تەگىن بارا الادى، دەپ حابارلايدى "ادىرنا" ۇلتتىق پورتالى.
مۇنداي شەشىمدى قالالىق اكىمدىك قابىلدادى. 2024 جىلعى 23 قاڭتاردا تاراتىلعان جولداۋدا بۇل وقۋ ۇدەرىسىن بايىتىپ، وقۋشىلاردىڭ مادەنيەتكە، ونەرگە جانە تاريحقا دەگەن قىزىعۋشىلىعىن وياتاتىنى اتاپ ءوتىلدى.
سونىمەن قاتار مۇراجايلارعا بارۋ بالالاردىڭ سىني ويلاۋى مەن تالداۋ داعدىلارىن دامىتۋعا كومەكتەسەدى.
"ەلىمىزدە 3,9 ملن وقۋشى بار. ءبىز بارلىق بالا مەن ءجاسوسپىرىم ونەر تۋىندىلارىن، ارتەفاكتىلەر مەن ەكسپوناتتاردى ءوز كوزدەرىمەن كورىپ، دۇنيەتانىمىن كەڭەيتكەنىن قالايمىز. بۇل ولارعا قوسىمشا ءبىلىم الىپ، تاريحي وقيعالارعا تەرەڭ ۇڭىلۋگە كومەكتەسەدى. مەكتەپ وقۋشىلارى مۋزەيلەرگە نەگىزىنەن سىنىپ جەتەكشىلەرىمەن بىرگە كەلەتىنىن بايقايمىز. ەندى ولار وقۋ جىلى بارىسىندا دا، دەمالىس كەزىندە دە الماتى اكىمدىگىنە قاراستى مۋزەيلەرگە تەگىن بارا الادى", - دەدى الماتى اكىمدىگىنىڭ ءباسپاسوز قىزمەتى.
وقۋشىلار تەگىن بارا الاتىن مۇراجايلار ءتىزىمى:
1. الماتى تاريحى مۋزەيى (قابانباي باتىر كوشەسى، 132)
2. ىقىلاس اتىنداعى حالىق مۋزىكالىق اسپاپتار مۋزەيى، (زەنكوۆ كوش.، 24/ا),
3. د.ا. قوناەۆ مۋزەيى (تولەباەۆ كوش.، 117),
4. ادەبي-مەموريالدىق مۋزەي كەشەنى:
س. مۇقانوۆتىڭ مۋزەي-ءۇيى (تولەباەۆ كوش.، 125, 3-پاتەر)
ع. مۇسىرەپوۆتىڭ مۋزەي-ءۇيى (قاراساي باتىر كوش.، 49, 25-پاتەر)
5. تىلەنديەۆتىڭ مەموريالدىق مۋزەيى (قوناەۆ كوش.، 96),
6. ا.بايتۇرسىنۇلىنىڭ مۋزەي-ءۇيى (بايتۇرسىنۇلى كوش.، 60)
7. رايىمبەك باتىر مۋزەي كەشەنى (رايىمبەك باتىر داڭع.، 96 ا)
8. مۋلتيمەديالىق ءداستۇرلى مۋزىكا ورتالىعى (نۇركەنت ش/ا، 5/11)
"ادىرنا" ۇلتتىق پورتالى
