فوتو:الماتى وبلىسىنىڭ وكق*
الماتى وبلىسىندا جىر الىبى جامبىل جاباەۆتىڭ ۇرپاعى قۇرىلتاي سايلاۋىندا ءوز تاڭداۋىن جاسادى. اقىننىڭ وتىزعا جۋىق شوبەرە-شوپشەگى الدىمەن جامبىل جاباەۆ اتىنداعى ادەبي-مەموريالدىق مۋزەيدە جينالىپ، اتالارىنىڭ رۋحىنا تاعزىم ەتتى.
كەيىن عاسىر جاساعان جامبىلدىڭ شوبەرەسى سالتانات جامبىلوۆا اتاسى تۋرالى جىلى ەستەلىك ايتىپ، حالىقتى ۇلت تاعدىرىنا تىكەلەي اسەر ەتەتىن تاريحي ساتتە بەلسەندى بولۋعا شاقىردى.
«جامبىل اتامىز عۇمىر بويى ەل بىرلىگى مەن حالىقتىڭ ىنتىماعىن جىرلاپ ءوتتى. ونىڭ ءاربىر جىرىنان تۋعان جەرگە دەگەن سۇيىسپەنشىلىك، ەل تاعدىرىنا دەگەن الاڭداۋشىلىق سەزىلەدى. ءبىز ونىڭ ۇرپاعى رەتىندە بابامىزدىڭ وسى اماناتىنا ادال بولىپ، ەلدىڭ بولاشاعىنا بەيجاي قاراماۋىمىز كەرەك. بۇگىن قۇرىلتاي سايلاۋىنا قاتىسىپ، ۇلت تاعدىرىنا اسەر ەتەتىن تاريحي ساتتە ءوز تاڭداۋىمىزدى جاساۋعا كەلدىك»، – دەدى اقىننىڭ ۇرپاعى سالتانات جامبىلوۆا.
مۋزەيگە كەلگەن قاۋىم جىر الىبى جامبىلدىڭ اۋلەتىمەن بىرگە سايلاۋ ۋچاسكەسىنە جاياۋ بەت الدى. جول بويى دومبىراشىلار حالىق كۇيلەرى مەن اۋەندەرىن ورىنداپ، سايلاۋشىلارعا مەرەكەلىك كوڭىل-كۇي سىيلادى.
جامبىل جاباەۆ – وتانعا دەگەن ماحابباتتى جىرىنا قوسقان اقىن. ونىڭ ولەڭدەرى ءبىر جارىم عاسىر وتسە دە، وزەكتىلىگىن جوعالتپاي، حالىقتىڭ جادىندا سايراپ تۇر. سوندىقتان اقىننىڭ ۇرپاعى دا وسى ۇستانىمنان اينىعان ەمەس. ولار قوعام ومىرىنە بەلسەنە ارالاسىپ، ازاماتتىق تاڭداۋ جاساۋ ارقىلى ەل بولاشاعىن ايقىنداۋعا ۇلەس قوسىپ كەلەدى.
ايتا كەتەرلىگى، بيىل – قازاقتىڭ ۇلى اقىنى جامبىل جاباەۆتىڭ تۋعانىنا 180 جىل. ول ءومىرىنىڭ سوڭعى جىلدارىن الماتى وبلىسىندا وتكىزدى. جىر الىبى تۇرعان ءۇي قازىر جامبىل جاباەۆ اتىنداعى ادەبي-مەموريالدىق مۋزەي رەتىندە جۇمىس ىستەپ تۇر. كيەلى شاڭىراققا اقىننىڭ شوبەرەسى سالتانات جاباەۆا جەتەكشىلىك ەتۋدە. بۇگىندە جامبىل اۋلەتى – ەلگە بەلگىلى، حالىق قۇرمەت تۇتاتىن ازاماتتار. ءجۇز جاساعان جامبىل اتامىزدىڭ ۇرپاعى تۇگەلدەي الماتى وبلىسىندا تۇرادى.
