بۇگىن، 26 قاراشادا الماتى قالاسىنداعى «سارىارقا» كينوتەاترىنىڭ ارتىنداعى ساياباقتا «جانۋارلار الەمىنە» جوق دە!» اتتى زورلىق-زومبىلىققا قارسى اكتسيا ءوتتى، دەپ حابارلايدى «ادىرنا» ءتىلشىسى.
ءىس-شارانى «جاڭا ادامدار» جاستار قوزعالىسى ۇيىمداستىردى. بەلسەندىلەردىڭ ايتۋىنشا، اكتسيانىڭ باستى ماقساتى — قازاق قوعامىنداعى زورلىق-زومبىلىق ماسەلەسىنە نازار اۋدارتۋ.
شاراعا كوپتەگەن بلوگەر، 600-گە جۋىق قالا تۇرعىنى جانە باق وكىلدەرى قاتىستى.
اكتسياعا كەلگەن مارقۇم سالتانات نۇكەنوۆانىڭ اعاسى ايتبەك امانگەلدى 2 اپتانىڭ ىشىندە ءومىرىنىڭ تۇبەگەيلى وزگەرگەنىن اتاپ ءوتتى. ايتۋىنشا، قازاقستان وتباسىلىق زورلىق-زومبىلىق ماسەلەسى بويىنشا جاڭا زاڭ قابىلداۋى ءتيىس.
«بىزگە وتباسىلىق-تۇرمىستىق زورلىق-زومبىلىققا قارسى جاڭا زاڭ قاجەت. الەمدى وزگەرتۋدى وزىمىزدەن باستاۋىمىز ءتيىس. زورلىق-زومبىلىق تۋرالى اشىق ايتىپ، قۇزىرلى ورگاندارعا حابارلاسۋ قاجەت. ءدال وسىلاي ۇندەمەي جۇرە بەرسەك، ەشتەڭە وزگەرمەيدى. ءبىزدىڭ جاعدايدى ەشكىمنىڭ باسىنا بەرمەسىن دەپ تىلەيمىن»،—دەدى ول.
ال تانىمال تەلەجۇرگىزۋشى، بلوگەر ديانا قىرىقباي اتا-انالاردى بالالارىن كىشكەنتاي كەزىنەن دۇرىس تاربيەلەۋگە شاقىردى.
«مارقۇم سالتاناتتى جاقسى تانيمىن. ەكەۋمىز استاناداعى فيتنەس ورتالىقتاردىڭ بىرىندە سپورتپەن اينالىسقان ەدىك. ورتاق تانىستارىمىز بار. جاقىندا بولعان جاعدايدى ەستىگەن كەزدە ءبارىمىزدىڭ جۇرەگىمىزدە قورقىنىش پايدا بولدى. بۇل وقيعاعا بەي-جاي قاراي المادىم. ۇنەمى الەۋمەتتىك جەلى ارقىلى نازىك جاندىلاردى كوپ وقۋعا، ءوز جاعدايىن جاساۋعا، ەرتە وتباسىن قۇرماۋعا شاقىرامىن. بارشا اتا-انا بالاعا كىشكەنتاي كەزىنەن دۇرىس تاربيە بەرىپ، قىز بالاسىن ۇرماۋ كەرەكتىگىن تۇسىندىرسە، دۇرىس بولار ەدى»،—دەدى جۋرناليست.
اكتسياعا قاتىسۋشىلار ءىس-شاراعا «زورلىق زومبىلىق ءبىزدىڭ ءداستۇر ەمەس»، «اكە، انامدى ۇرماشى»، «كەلەسى قۇربان بولۋدان قورقامىن» سىندى ءتۇرلى جازۋى بار پلاكاتتەرمەن كەلىپ، زورلىق-زومبىلىقتى قولدامايتىندارىن جەتكىزدى.
