تۇركىستان وبلىسىندا مەملەكەت باسشىسى قاسىم-جومارت توقاەۆتىڭ باستاماسىمەن جۇزەگە اسىپ جاتقان «تازا قازاقستان» جالپىۇلتتىق ەكولوگيالىق اكتسياسى اياسىندا «WORLD CLEANUP DAY» – دۇنيەجۇزىلىك تازالىق كۇنىنە وراي اۋقىمدى ەكولوگيالىق ءىس-شارا ۇيىمداستىرىلدى.
نەگىزگى ءىس-شارا قاراتاۋ جوتاسىنىڭ ەتەگىندە ورنالاسقان اششىساي ەلدى مەكەنىندە ۇيىمداستىرىلىپ، وعان 4 مىڭنان استام ادام قاتىسىپ، 70 ارنايى تەحنيكا جۇمىلدىرىلدى. سونداي-اق قورشاعان ورتانى اباتتاندىرۋ جانە كوگالداندىرۋ ماقساتىندا 100 ءتۇپ اعاش كوشەتى وتىرعىزىلدى.
ءىس-شارانىڭ نەگىزگى ماقساتى – قورشاعان ورتانىڭ تازالىعىن ساقتاۋ، تابيعي اۋماقتاردى تۇرمىستىق قالدىقتاردان تازارتۋ، ەكولوگيالىق مادەنيەتتى قالىپتاستىرۋ جانە تۇرعىنداردى تابيعاتتى قورعاۋعا بەلسەندى قاتىسۋعا شاقىرۋ.
ەكواكتسياعا تۇركىستان وبلىسىنىڭ اكىمى نۇرالحان كوشەروۆ، مەملەكەتتىك قىزمەتشىلەر، قۇزىرلى ورگان وكىلدەرى، جاستار، ەرىكتىلەر مەن قوعامدىق ۇيىم وكىلدەرى جانە تازالىققا جاۋاپتى كوممۋنالدىق مەكەمەنىڭ قىزمەتكەرلەرى دە بەلسەنە اتسالىستى.
وبلىس اكىمى ءوز سوزىندە تازالىق مادەنيەتىن قالىپتاستىرۋ – ءبىر كۇندىك ناۋقان ەمەس، ءاربىر ازاماتتىڭ كۇندەلىكتى ءومىر سالتىنا اينالۋى ءتيىس ەكەنىن اتاپ ءوتتى.
– «تازا قازاقستان» – جاي عانا سەنبىلىك ەمەس. بۇل – تۋعان جەرگە جاناشىرلىقتىڭ، ورتاق جاۋاپكەرشىلىكتىڭ جانە ازاماتتىق مادەنيەتتىڭ كورىنىسى. ءاربىر تۇرعىن ءوز اۋلاسىنا، ءوز كوشەسىنە، ءوز اۋىلىنا جاناشىرلىقپەن قاراسا، ءوڭىرىمىزدىڭ كەلبەتى ودان ءارى كوركەيە تۇسەدى. مەملەكەت باسشىسى قاسىم-جومارت كەمەلۇلىتوقاەۆتىڭ باستاماسىمەن قولعا الىنعان «تازا قازاقستان» باعدارلاماسىنىڭ تۇپكى ءمانى مەن مۇراتى دا وسىندا جاتىر. بۇل – جاي ناۋقان ەمەس، ۇلتتىق سانانى تاربيەلەۋگە، ەلدىڭ ەرتەڭىن ويلاۋعا نەگىزدەلگەن كورەگەن ساياسات. تۇركىستان – تاريحى تەرەڭ، تۇلەگى دانا، توپىراعىقاسيەتتى ءوڭىر. وسى ولكەنىڭ تازالىعى، كوركەيۋى مەن اباتتانۋى – بارشامىزعا پارىز. قاسيەتتى جەردى قاسيەتتى ىستەرمەن ۇلىقتايىق، – دەدى نۇرالحان كوشەروۆ.
اكتسيا بارىسىندا تاۋ بوكتەرى مەن قوعامدىق اۋماقتار تازارتىلىپ، قوقىس شىعارىلدى، سونداي-اق قورشاعان ورتانى كوگالداندىرۋ باعىتىنداعى جۇمىستار جۇرگىزىلدى. ناتيجەسىندە 93 توننا قوقىس شىعارىلىپ، 72 گەكتار اۋماق تازارتىلدى. ايتا كەتسەك، تۇركىستان وبلىسى بويىنشا جالپىۇلتتىق ەكولوگيالىق اكتسياعا 74 مىڭعا جۋىق ادام قاتىستى.
جالپى، تۇركىستان وبلىسىندا «تازا قازاقستان» باعدارلاماسى اياسىنداعى جۇمىستار جۇيەلى تۇردە جالعاسىپ كەلەدى. بۇعان دەيىن وتكەن كۇزگى تازالىق اكتسيالارىنا 15 مىڭنان استام ادام قاتىسىپ، 779,8 توننا قوقىس شىعارىلىپ، 508 گەكتاردان استام اۋماق تازارتىلعان بولاتىن.
