قازاقستاندىق تازى ءوسىرۋشى اننا زاحاروۆا مەملەكەت باسشىسى قاسىم-جومارت توقاەۆ سىيعا تارتقان قولساعاتىن ساتۋدان باس تارتتى، دەپ حابارلايدى “ادىرنا” ءتىلشىسى.
ول ساعاتتى ءوزى ءۇشىن جاي عانا باعالى بۇيىم ەمەس، پرەزيدەنتپەن كەزدەسۋدەن قالعان ەرەكشە ەستەلىك دەپ سانايتىنىن ايتتى.
بۇعان دەيىن اننا زاحاروۆا توقاەۆ سىيعا تارتقان ساعاتىن ساتىلىمعا قويعان ەدى. ونىڭ باعاسى 2 ميلليون 899 مىڭ تەڭگە دەپ كورسەتىلگەن. سونداي-اق بۇيىمنىڭ تۇپنۇسقالىعىن راستايتىن قۇجاتتارى بار ەكەنى جازىلعان.
زاحاروۆانىڭ ايتۋىنشا، پرەزيدەنت وعان ساعاتتى 2023 جىلى ناۋرىز مەرەكەسى كەزىندە سىيلاعان. سول كەزدەسۋدە تازى ءوسىرۋشى مەملەكەت باسشىسىنا ءبىر جارىم ايلىق تازى كۇشىگىن تارتۋ ەتكەن. ءوز كەزەگىندە قاسىم-جومارت توقاەۆ وعان قولتاڭباسى قويىلعان ساعات سىيلاعان.
العاشىندا زاحاروۆا ساعاتتى تاقپايتىنىن ايتىپ، ونى كوللەكتسيونەرلەرگە ساتۋدى جوسپارلاعان. ول ۋاقىت وتە كەلە بۇيىمنىڭ قۇنى ارتۋى مۇمكىن ەكەنىن ايتىپ، الداعى ون جىلدا ساعاتتىڭ باعاسى 30 ميلليون تەڭگەگە دەيىن جەتۋى ىقتيمال دەگەن بولجام جاساعان.
الايدا ساعاتتىڭ ساتىلىمعا قويىلعانى تۋرالى اقپارات تاراعاننان كەيىن ويىن وزگەرتكەن.
«بۇل سىيلىقتىڭ مەن ءۇشىن ارقاشان ەرەكشە قۇندىلىعى بولدى. ساعاتتى العان ساتتەن باستاپ ونى جاي عانا زات رەتىندە ەمەس، مەملەكەت باسشىسىمەن جەكە كەزدەسۋدەن قالعان ماڭىزدى ءارى ەرەكشە ەستەلىك سىيلىق رەتىندە قابىلدادىم»، – دەدى اننا زاحاروۆا.
