جۋرناليست اسەت ماتاەۆ قازاقستان پرەزيدەنتى قاسىم-جومارت توقاەۆتىڭ اتىنا اشىق حات جولدادى، دەپ حابارلايدى "ادىرنا" ۇلتتىق پورتالى.
قازتاگ مالىمەتىنشە، اشىق حاتتا ەكىباستۇزدا اشىلعان جاڭا فەرروسيليتسيۋم ءوندىرىسىنىڭ مەملەكەتتىك قارجىلاندىرىلۋى مەن جوباعا نىعماتۋللين اۋلەتىنىڭ قاتىسۋىنا الاڭداۋشىلىق بىلدىرىلگەن.
ماتاەۆتىڭ ايتۋىنشا، 24.KZ ارناسىنداعى جاڭالىقتار سيۋجەتىندە پاۆلودار وبلىسىنىڭ اكىمى اسايىن بايحانوۆ پەن بۇرىنعى دەپۋتات ەرلان نىعماتۋللين اشقان ءوندىرىس مەملەكەتتىك قولداۋمەن جۇزەگە اسقان. اشىق دەرەكتەرگە سۇيەنسەك، قۇنى 92,2 ملرد تەڭگەنى قۇرايتىن زاۋىتتىڭ 80 پايىزى (72 ملرد تەڭگە) قازاقستاننىڭ دامۋ بانكى ارقىلى قارجىلاندىرىلعان.
جۋرناليست بۇل جاعدايدى «ادىلەتتى قازاقستان» يدەياسىمەن سالىستىرا وتىرىپ، ەكونوميكالىق جانە ساياسي رەسۋرستاردىڭ ءالى دە ساناۋلى اۋلەتتەر قولىندا شوعىرلانىپ وتىرعانىنىڭ بەلگىسى دەپ باعالايدى.
«وكىنىشكە قاراي، سول 166 وتباسىنىڭ كوبى ءالى كۇنگە دەيىن قازاقستاندى باسقارىپ وتىر. ولاردىڭ قاتارىندا نىعماتۋلليندەر وتباسى دا بار. حالىق ولاردى كەزىندە قاراعاندى ءوڭىرىنىڭ بەيرەسمي يەلەرى اتادى»، – دەيدى ماتاەۆ.
ول حاتىندا ءوز وتباسىنىڭ نىعماتۋلليندەرمەن اراداعى جانجالىنان كەيىن باستان وتكەرگەن قىسىم، قۋدالاۋ، مۇلىكتى جوعالتۋ جانە دەنساۋلىقتىڭ ناشارلاۋىنا الىپ كەلگەن وقيعالاردى دا ەگجەي-تەگجەيلى بايانداعان. ماتاەۆتىڭ ايتۋىنشا، ولاردىڭ ءىسى 2022 جىلعا دەيىن ىلگەرىلەمەگەن، سەبەبى بيلىك قۇرىلىمىندا بۇرىنعى ىقپالدى توپتاردىڭ وكىلدەرى وتىرعان.
«2022 جىلدىڭ شىلدەسىندە ءبىز تولىق اقتالدىق، مەملەكەت اتىنان رەسمي تۇردە كەشىرىم سۇرالدى. ەۋروپارلامەنت پەن ەقىۇ ءبىزدىڭ ءىسىمىزدى ساياسي ءىس دەپ تانىدى»،- دەپ جازادى ول.
سونىمەن بىرگە جۋرناليست ءوزىنىڭ پرەزيدەنتكە ۇندەۋىنىڭ جەكە رەنىشتەن تۋىنداماعانىن، قوعامداعى ادىلەتتىلىككە دەگەن سەنىمنىڭ السىرەۋىنە الاڭداۋدان تۋعانىن اتاپ وتەدى.
