Qazaqstandyq tazy ösıruşı Anna Zaharova Memleket basşysy Qasym-Jomart Toqaev syiǧa tartqan qolsaǧatyn satudan bas tartty, dep habarlaidy “Adyrna” tılşısı.
Ol saǧatty özı üşın jai ǧana baǧaly būiym emes, Prezidentpen kezdesuden qalǧan erekşe estelık dep sanaitynyn aitty.
Būǧan deiın Anna Zaharova Toqaev syiǧa tartqan saǧatyn satylymǧa qoiǧan edı. Onyŋ baǧasy 2 million 899 myŋ teŋge dep körsetılgen. Sondai-aq būiymnyŋ tüpnūsqalyǧyn rastaityn qūjattary bar ekenı jazylǧan.
Zaharovanyŋ aituynşa, Prezident oǧan saǧatty 2023 jyly Nauryz merekesı kezınde syilaǧan. Sol kezdesude tazy ösıruşı Memleket basşysyna bır jarym ailyq tazy küşıgın tartu etken. Öz kezegınde Qasym-Jomart Toqaev oǧan qoltaŋbasy qoiylǧan saǧat syilaǧan.
Alǧaşynda Zaharova saǧatty taqpaitynyn aityp, ony kolleksionerlerge satudy josparlaǧan. Ol uaqyt öte kele būiymnyŋ qūny artuy mümkın ekenın aityp, aldaǧy on jylda saǧattyŋ baǧasy 30 million teŋgege deiın jetuı yqtimal degen boljam jasaǧan.
Alaida saǧattyŋ satylymǧa qoiylǧany turaly aqparat taraǧannan keiın oiyn özgertken.
«Būl syilyqtyŋ men üşın ärqaşan erekşe qūndylyǧy boldy. Saǧatty alǧan sätten bastap ony jai ǧana zat retınde emes, Memleket basşysymen jeke kezdesuden qalǧan maŋyzdy ärı erekşe estelık syilyq retınde qabyldadym», – dedı Anna Zaharova.
