قر مادەنيەت جانە اقپارات ءمينيسترى ايدا بالاەۆا پرەزيدەنت قاسىم-جومارت توقاەۆتىڭ قازىرگى الەمدىك ەكونوميكالىق جاعدايعا بايلانىستى جاساعان مالىمدەمەسىنە قاتىستى Facebook پاراقشاسىندا پىكىر ءبىلدىردى، دەپ حابارلايدى "ادىرنا" ۇلتتىق پورتالى.
مينيستر ءوز جازباسىندا مەملەكەت باسشىسىنىڭ سوزدەرىندە ەلدىڭ بولاشاعىنا سەنىم مەن جاۋاپتى كوزقاراس ايقىن كورىنەتىنىن اتاپ ءوتتى:
"پرەزيدەنتىمىز قاسىم-جومارت توقاەۆ جاھاندىق تۇراقسىزدىق جاعدايىندا قازاقستاننىڭ ۇستاناتىن باعىتىن ايقىنداپ بەردى. شىنىندا دا، الەم بۇرىن-سوڭدى بولماعان ەكونوميكالىق داعدارىستىڭ الدىندا تۇر. وسىنداي كۇردەلى كەزەڭدە ەل تىزگىنىن ۇستاپ وتىرعان باسشىنىڭ سابىرلى، بايىپتى ءارى سەنىمدى مالىمدەمەسى – حالىق ءۇشىن ۇلكەن تىرەك. مەملەكەت سىرتقى قىسىم مەن وزگەرىستەرگە قاراماستان دامۋ جولىن جالعاستىرادى. بۇل – جۇيەلى ءارى ناقتى جوسپارمەن جۇزەگە اسادى." – دەپ جازدى بالاەۆا.
ول سونداي-اق توقاەۆتىڭ “داعدارىستىڭ دا ءوز قايىرى بار” دەگەن سوزىنە ەرەكشە توقتالدى.
ء"ار داعدارىس – جاڭا مۇمكىندىك. پرەزيدەنتتىڭ وسى ءسوزى – ءاربىر باسشى مەن قوعام مۇشەسىنە وي سالۋى ءتيىس. مۇنداي سىن-قاتەر كەزەڭىندە ارقايسىمىزدان جاۋاپكەرشىلىك پەن شۇعىل ارەكەت تالاپ ەتىلەدى. ەلدىڭ مۇددەسى بارىنەن بيىك تۇرۋى كەرەك،" – دەدى مينيستر.
ايدا بالاەۆا ۇكىمەت پەن اكىمدەرگە بەرىلگەن تاپسىرمالاردىڭ ناقتى ىسكە اساتىنىنا سەنىم ءبىلدىرىپ، حالىقتى سابىر مەن سەنىمگە شاقىردى.
"قازىرگىدەي كۇردەلى كەزەڭدە بىرلىگىمىز بەكەم بولسا، الىنبايتىن اسۋ جوق. ەل پرەزيدەنتى ناقتى باعىتتى كورسەتىپ وتىر. ءبىز سول جولمەن نىق قاداممەن ءجۇرۋىمىز كەرەك", – دەپ تۇيىندەدى مينيستر ءوز جازباسىن.
