ماكينسك قالاسىنداعى №1 مەكتەپتە كۇردەلى جوندەۋ جۇمىستارى اياقتالىپ، ءبىلىم ورداسى جاڭا وقۋ جىلىن جاڭارعان عيماراتتا قارسى الۋعا دايىن. جارتى عاسىردان استام ۋاقىت بۇرىن سالىنعان مەكتەپ عيماراتى العاش رەت اۋقىمدى تۇردە جاڭعىرتىلىپ، مۇندا وقۋشىلار مەن پەداگوگتەر ءۇشىن قاۋىپسىز ءارى قولايلى جاعداي جاسالدى.
كۇردەلى جوندەۋ جۇمىستارى 2025–2026 جىلدارعا جوسپارلانعان ەكى جىلدىق جوبا اياسىندا جۇرگىزىلدى. جوبانىڭ نەگىزگى كەزەڭى بيىل ماۋسىم ايىندا باستالىپ، جاڭا وقۋ جىلى قارساڭىندا تولىق اياقتالدى.
جوندەۋ بارىسىندا مەكتەپتىڭ ينجەنەرلىك ينفراقۇرىلىمى جاڭارتىلدى. اتاپ ايتقاندا، ەلەكترمەن، سۋمەن جانە جىلۋمەن جابدىقتاۋ جۇيەلەرىنە جوندەۋ جۇرگىزىلىپ، كارىز جۇيەسىنىڭ جەكەلەگەن ەلەمەنتتەرى اۋىستىرىلدى. سانيتارلىق توراپتار دا تولىق رەتكە كەلتىرىلدى. سونىمەن قاتار عيماراتقا اۆتوماتتى ءورت دابىلى مەن بەينەباقىلاۋ جۇيەسى ورناتىلدى.
ءبىلىم وشاعىنىڭ ىشكى بولمەلەرىندە دە بىرقاتار جۇمىستار اتقارىلدى. ەسىكتەر مەن ەدەن جابىندارى اۋىستىرىلىپ، ەدەنگە تەگىستەۋ جۇمىستارى جۇرگىزىلدى. ءبىرىنشى قاباتتاعى قابىرعالار سىرلانىپ، وقۋ كابينەتتەرى مەن وزگە دە بولمەلەر جاڭا وقۋ جىلىنا دايىندالدى. جوبادا كوزدەلگەن بارلىق جۇمىس تولىق كولەمدە ورىندالدى.
مەكتەپ ديرەكتورى اسەنيا سىنگىروۆنانىڭ ايتۋىنشا، بۇل ءبىلىم ورداسىنىڭ تاريحىنداعى ماڭىزدى جاڭارۋلاردىڭ ءبىرى.
«مەكتەبىمىز ءۇشىن بۇل – ايتۋلى وقيعا. عيمارات 1970 جىلى سالىنعان. وسى ۋاقىتقا دەيىن مۇندا مۇنداي اۋقىمدى كۇردەلى جوندەۋ جۇرگىزىلمەگەن. قازىر ينجەنەرلىك كوممۋنيكاتسيالار جاڭارتىلىپ، بارلىق بولمە رەتكە كەلتىرىلدى. ەڭ باستىسى – بالالار مەن پەداگوگتەر ءۇشىن وقۋ جانە ەڭبەك ەتۋگە قولايلى جاعداي جاسالدى. مەكتەپ جاڭا وقۋ جىلىنا تولىق دايىن»، – دەدى مەكتەپ ديرەكتورى.
قازىرگى تاڭدا مەكتەپتە 680 وقۋشى ءبىلىم الادى. وقۋ پروتسەسى ينكليۋزيۆتى ءبىلىم بەرۋ قاعيداتتارىن ەسكەرە وتىرىپ ۇيىمداستىرىلعان. ەرەكشە ءبىلىم بەرۋ قاجەتتىلىكتەرى بار بالالاردىڭ ساپالى ءبىلىم الۋىنا جانە مەكتەپتە جايلى ورتادا بولۋىنا قاجەتتى جاعداي قاراستىرىلعان.
جالپى، بيىل بۇلاندى اۋدانىندا ءبىر مەكتەپكە كۇردەلى جوندەۋ جۇرگىزىلدى. سونىمەن قاتار ەكى مەكتەپ پەن ءبىر بالاباقشادا اعىمداعى جوندەۋ جۇمىستارى اتقارىلدى.
جاڭارعان مەكتەپ جاڭا وقۋ جىلىندا وقۋشىلارعا ساپالى ءبىلىم الۋعا، ال پەداگوگتەرگە ءوز مىندەتتەرىن قولايلى جاعدايدا اتقارۋعا مۇمكىندىك بەرەدى.
