جەلىدە وقۋشىنى ۇرعان مۇعالىمنىڭ ۆيدەوسى تاراعان بولاتىن. سول ارەكەتى ءۇشىن ول جۇمىسىنان شىعارىلدى، دەپ حابارلايدى «ادىرنا» ۇلتتىق پورتالى قازاقپارات-قا سىلتەمە جاساپ.
بەلگىلى بولعانداي، تسەلينوگراد اۋدانىنىڭ جاڭاەسىل اۋىلىندا جالپى ءبىلىم بەرەتىن مەكتەپ ديرەكتورىنىڭ تاربيە ءىسى جونىندەگى ورىنباسارى تەمەكى شەككەن وقۋشىمەن دورەككى سويلەسكەنى ءۇشىن ونى پەداگوگيكالىق ادەپ جونىندەگى كەڭەس جۇمىسىنان شىعارعان.
اقمولا وبلىستىق ءبىلىم باسقارماسى ءباسپاسوز قىزمەتىنىڭ مالىمەتىنشە، وسى دەرەك بويىنشا قىزمەتتىك تەرگەۋ جۇرگىزىلگەن. ەكىنشى ساباقتان كەيىنگى ءۇزىلىس كەزىندە 7,9,10 سىنىپ وقۋشىلارى سپورتزالعا ۆولەيبول ويناۋعا بارعان. الايدا، دەنە شىنىقتىرۋ ءپانىنىڭ مۇعالىمى ا.يۋتينا وقۋشىلاردىڭ ۆولەيبول ويناعانىن ەمەس، 7-سىنىپ وقۋشىسى د.كيمنىڭ تەمەكى شەگىپ تۇرعانىن كورگەن. وسى كەزدە مۇعالىم بىردەن مەكتەپ ديرەكتورىنىڭ تاربيە جونىندەگى ورىنباسارى ب.مەكەبايدى شاقىرعان، ول وقۋشىمەن اڭگىمەلەسكەن.
اڭگىمە بارىسىندا وقۋشى سپورتزالدا تەمەكى شەگەتىنىن مويىنداعان. وقۋشىنىڭ بۇل جاۋابى مەكتەپ ديرەكتورى ورىنباسارىنىڭ اشۋىنا ءتيىپ، ول ەموتسياعا ەرىك بەرگەن.
«ءبىلىم ءبولىمىنىڭ جۇمىس توبى جاڭاەسىل اۋىلىنداعى بالالارمەن، اتا-انالارمەن جانە مەكتەپتىڭ پەداگوگيكالىق ۇجىمىمەن اڭگىمەلەستى. وسى دەرەك بويىنشا جۇرگىزىلگەن تالقىلاۋدان كەيىن كامەلەتكە تولماعان بالانىڭ زاڭدى وكىلى د.كيمنەن پەداگوگ ب.مەكەبايعا شاعىمدان باس تارتۋ تۋرالى ءوتىنىش كەلىپ ءتۇستى. دەگەنمەن، بۇل جاعداي جاڭاەسىل اۋىلى مەكتەبىنىڭ پەداگوگيكالىق ادەپ جونىندەگى كەڭەسىنىڭ وتىرىسىندا قارالدى، وندا قر ەڭبەك كودەكسىنىڭ 52-بابىنىڭ 14-تارماعىنا سايكەس ب.مەكەبايدى جۇمىستان شىعارۋ تۋرالى شەشىم قابىلداندى»، - دەدى ۆەدومستۆودان.
«ادىرنا» ۇلتتىق پورتالى
