استاناداعى Alem.ai الاڭىندا مەملەكەتتىك ورگانداردىڭ، جوعارى وقۋ ورىندارىنىڭ، تەحنولوگيالىق كومپانيالار مەن ساراپشىلار قاۋىمداستىعىنىڭ وكىلدەرىن بىرىكتىرگەن Qazbot Robotics Forum ءوتتى. بۇل تۋرالى عىلىم جانە جوعارى ءبىلىم مينيسترلىگى ايتتى، دەپ حابارلايدى «ادىرنا» ءتىلشىسى.
فورۋم بارىسىندا قازاقستاندا گۋمانويد روبوتتار ءوندىرىسىن ىسكە قوسۋ جوباسى تانىستىرىلعان. ول روبوتوتەحنيكا، جاساندى ينتەللەكت جانە ونەركاسىپتىك ءوندىرىس باعىتتارىن بىرىكتىرىپ، ەلدەگى ينجەنەرلىك جانە تەحنولوگيالىق قۇزىرەتتەردى دامىتۋعا باعىتتالعان.
ء«بىزدىڭ مىندەتىمىز – دايىن تەحنولوگيالىق شەشىمدەردى ەنگىزۋمەن عانا شەكتەلمەي، قازاقستاندا ءوزىمىزدىڭ ينجەنەرلىك جانە عىلىمي قۇزىرەتتەرىمىزدى قالىپتاستىرۋ. گۋمانويد روبوتتار ءوندىرىسى ۋنيۆەرسيتەتتەر، عالىمدار مەن يندۋستريانى ءبىرتۇتاس تەحنولوگيالىق تىزبەككە بىرىكتىرەتىن الاڭعا اينالۋى ءتيىس. بۇل – ماماندار دايارلاۋ مەن عىلىمي زەرتتەۋلەردەن باستاپ، تەحنولوگيالىق شەشىمدەردى ازىرلەۋ جانە ولاردى ونەركاسىپتە قولدانۋعا دەيىنگى تولىق تسيكل. ءبىز ءبىلىم، عىلىم جانە ءوندىرىستى ىقپالداستىرۋدىڭ ءدال وسىنداي مودەلىن كەڭەيتۋدى كوزدەپ وتىرمىز»، – دەدى عىلىم جانە جوعارى ءبىلىم ءمينيسترى ساياسات نۇربەك.
بۇگىندە ەلىمىزدە جاڭا تەحنولوگيالىق باعىتتى دامىتۋعا قاجەتتى كادرلىق بازا قالىپتاسىپ كەلەدى. قازاقستاندىق جوعارى وقۋ ورىندارىندا روبوتوتەحنيكا، مەحاترونيكا، ونەركاسىپتىك اۆتوماتتاندىرۋ، ينتەللەكتۋالدى جۇيەلەر جانە جاساندى ينتەللەكت سالالارى بويىنشا 56 ءبىلىم بەرۋ باعدارلاماسى جۇزەگە اسىرىلۋدا.
فورۋم اياسىندا ساياسات نۇربەك QAZBOT جانە AgiBot باسشىلىعىمەن كەزدەسىپ، ينجەنەرلىك كادرلار دايارلاۋ، بەيىندى زەرتحانالار قۇرۋ، بىرلەسكەن عىلىمي زەرتتەۋلەر جۇرگىزۋ جانە ستۋدەنتتەر مەن عالىمداردى گۋمانويد روبوتوتەحنيكا جوبالارىنا تارتۋ ماسەلەلەرىن تالقىلاعان.
جوبانى ىسكە اسىرۋ قازاقستاندا روبوتوتەحنيكا مەن جاساندى ينتەللەكت سالاسىنداعى ينجەنەرلىك جانە عىلىمي الەۋەتتى دامىتۋعا، سونداي-اق ءبىلىم، عىلىم جانە ءوندىرىس اراسىنداعى بايلانىستى كۇشەيتۋگە مۇمكىندىك بەرمەك.
