الەۋمەتتىك جەلىدە Unitree كومپانياسىنىڭ گۋمانويدتى روبوتى ەر ادامدى ۇرىپ جىبەرگەنى تۇسىرىلگەن بەينە تارادى، دەپ حابارلايدى "ادىرنا" ۇلتتىق پورتالى.
ۆيدەو قىتايداعى كادىمگى كەڭسە ىشىندە تۇسىرىلگەن.
روبوتتى باسقارعان وپەراتور كيكبوكسينگتەگى سوققىلارىن جاساپ، قوزعالا باستاعان كەزدە روبوت كەنەتتەن سەكىرىپ، ونى شاپ ايماعىنان ۇرىپ جىبەرگەن.
Bilibili پلاتفورماسىندا جاريالانعان بەينەنىڭ اۆتورى روبوتتىڭ نەيروجەلىگە نەگىزدەلگەن قوزعالىستى باسقارۋ مودەلى ارقىلى باسقارىلعانىن ءتۇسىندىردى. وسى سەبەپتى ادام مەن روبوتتىڭ ارەكەتتەرى اراسىندا ازداعان كەشىگۋ بار. ساراپشىلاردىڭ ايتۋىنشا، تەحنولوگيا دامىعان سايىن بۇل كىدىرىس 0,1 سەكۋندقا دەيىن قىسقارۋى مۇمكىن.
جەلى قولدانۋشىلارى بۇل جاعدايدى ازىلگە اينالدىرىپ، «روبوتوتەحنيكانىڭ ءۇش زاڭى» ەسكەرىلمەگەنىن ايتىپ قالجىڭداۋدا.
الايدا ماماندار بۇل جاعدايدا اڭگىمە دەربەس شەشىم قابىلدايتىن روبوتتار تۋرالى ەمەس، تولىقتاي ادام باسقارۋىنداعى «روبوت-مانەكەندەر» جايىندا ەكەنىن اتاپ ءوتتى.
سونىمەن قاتار بەينە گۋمانويدتى روبوتتاردىڭ يكەمدىلىگى ارتىپ كەلە جاتقانىن كورسەتتى. قازىرگى تاڭدا مۇنداي روبوتتار جۇگىرەدى، بيلەيدى جانە ءتۇرلى تاپسىرمالاردى ورىندايدى.
