كاسىپكەر، بلوگەر ءارى Respublica پارتياسىنىڭ بەلسەندى وكىلدەرىنىڭ ءبىرى بەيبىت الىبەكوۆ اكەسى باقىت الىبەكوۆتىڭ Facebook پاراقشاسىندا جاريالانعان داۋلى جازبالارىنا قاتىستى پىكىر ءبىلدىردى، دەپ حاباردايدى "ادىرنا".
سوڭعى ۋاقىتتا الەۋمەتتىك جەلىدە باقىت الىبەكوۆتىڭ قازاق حالقىنا قاتىستى «قازانباستار»، «مامبەت» سەكىلدى كەمسىتۋشىلىك سيپاتتاعى سوزدەر قولدانىلعان، سونداي-اق ناۋرىز مەيرامىنا قاتىستى وتكىر پىكىر ايتىلعان جازبالارى قىزۋ تالقىلانۋدا.
وسىعان بايلانىستى بەيبىت الىبەكوۆ Threads پلاتفورماسىندا پىكىر ءبىلدىرىپ، اكەسىنىڭ كوزقاراستارىن ەشقاشان قولداماعانىن اتاپ ءوتتى.
«بارلىعىمىز اتا-انانى تاڭدامايمىز، ولار دا ءبىزدى تاڭداي المايتىنى انىق. اكەمنىڭ كوزقاراستارى مەن پىكىرلەرىن ەشقاشان قولداعان ەمەسپىن جانە بۇل تۋرالى بىرنەشە رەت اشىق ايتتىم»، – دەپ جازدى ول.
بەيبىت الىبەكوۆتىڭ ايتۋىنشا، اكەسى ەكەۋى – جەكە ۇستانىمى مەن جاۋاپكەرشىلىگى بار ەكى بولەك تۇلعا. سوندىقتان ءار ادام ءوز سوزدەرى مەن ارەكەتتەرىنە عانا جاۋاپ بەرۋى كەرەك.
«بالاسى اكەسىنىڭ ايتقان ءسوزى نەمەسە جاساعان ارەكەتى ءۇشىن جاۋاپ بەرۋگە ءتيىس ەمەس دەپ ويلايمىن. سانالى، جاسى كەلگەن ادامنىڭ پىكىرى ءۇشىن مەنىڭ اقتالۋعا مىندەتىم جوق. مەنىڭ ءوز پىكىرىم، ءوز ءومىرىم جانە ءوز جاۋاپكەرشىلىگىم بار. سول ءۇشىن تولىقتاي جاۋاپ بەرۋگە دايىنمىن»، – دەدى ول.
ول اتا-انا مەن بالانىڭ جەكە تۇلعا رەتىندە ءبىر-بىرىنەن تاۋەلسىز ەكەنىن جانە اركىمنىڭ ءوز كوزقاراسى ءۇشىن ءوزى جاۋاپ بەرۋى قاجەت ەكەنىن اتاپ ءوتتى.
