14 tamyzda Ortalyq Aziianyŋ energetikalyq jüiesınde bolǧan tehnologiialyq apat sebebı anyqtalǧan, dep habarlaidy "Adyrna" tılşısı.
«KEGOC» AQ mälımetınşe, 14 tamyz saǧat 14:37-de Qyrǧyzstandaǧy Toktoǧūl su elektr stansiiasynda jalpy quaty 600 MVt bolatyn ekı gidrogenerator ajyratylǧan. Sonyŋ saldarynan «Soltüstık – Şyǧys – Oŋtüstık» tranzittık jelısıne şamadan tys jükteme tüsıp, Qazaqstannyŋ oŋtüstık aimaǧy Bırtūtas elektr energetikalyq jüieden jäne Ortalyq Aziianyŋ bırlesken energetikalyq jüiesınen ajyraǧan.
Oqiǧa saldarynan Almaty, Jambyl, Türkıstan, Qyzylorda jäne Jetısu oblystarynyŋ bır bölıgınde elektr quaty öştı. Sonymen qatar Qaraǧandy, Ūlytau jäne Abai oblystarynda da tūtynuşylar jaryqsyz qaldy.
«KEGOC» mälımetınşe, Qaraǧandy, Ūlytau jäne Abai oblystaryndaǧy elektrmen jabdyqtau saǧat 14:47-de tolyq qalpyna keltırıldı. Almaty men Jetısu oblystarynda elektr quaty saǧat 16:26-da, al Jambyl, Türkıstan jäne Qyzylorda oblystarynda saǧat 16:34-te qaita berılgen.
Qazaqstan energetika ministrlıgınıŋ habarlauynşa, Ortalyq Aziia energetikalyq jüiesınen keletın elektr energiiasy aǧynynyŋ kürt özgeruı saldarynan apatqa qarsy avtomatika ıske qosylǧan. Būl bırqatar öŋırdegı tūtynuşylardyŋ elektr jelısınen ajyratyluyna sebep boldy.
Apat saldary Qazaqstanmen qatar Ortalyq Aziianyŋ basqa da elderınde baiqaldy. Özbekstannyŋ Surhandariia oblysy men keibır öŋırlerınde elektr energiiasy uaqytşa öşken. Qyrǧyzstanda Bışkektıŋ bırqatar audanynda elektr quaty üzıldı.
Täjıkstanda da Duşanbe, Kuliab, Hudjand, Vahdat, Nürek, Gissar, Şahrinav jäne Rogun qalalarynda elektrmen jabdyqtauda üzılıster tırkeldı.
Almatyda elektr quatynyŋ öşuıne bailanysty bırqatar köşede baǧdarşamdar jūmys ıstemei, kölık keptelısı paida boldy. «Alatau Jaryq Kompaniiasy» AQ mälımetınşe, L-5400, L-5300 jäne L-5320 jelılerınde apattyq ajyratu bolyp, apatqa qarsy avtomatika ıske qosylǧan. Ajyratylǧan jükteme kölemı 300 MVt-ty qūrady.
