اۋعانستان مەن پاكىستان اراسىنداعى قارۋلى قاقتىعىستى توقتاتۋ ماقساتىندا ەكى ەلدىڭ دەلەگاتسيالارى قاتار استاناسى دوحادا كەلىسسوز وتكىزبەك، دەپ حابارلايدى "ادىرنا" ۇلتتىق پورتالى.
ABC News-ءتىڭ دەرەگىنشە، شەكارا ماڭىنداعى قاقتىعىستار سالدارىنان ونداعان ادام قازا تاۋىپ، جۇزدەگەن ادام جارالانعان. بۇل سوڭعى جىلدارداعى ەكى ەل اراسىنداعى ەڭ اۋىر داعدارىستاردىڭ ءبىرى سانالادى.
تاليبان ۇكىمەتىنىڭ مالىمەتىنشە، اۋعان دەلەگاتسياسىنىڭ قۇرامىندا قورعانىس ءمينيسترى مەن ۇلتتىق بارلاۋ باسقارماسىنىڭ باسشىسى بار.
پاكىستان اۋعانستاندى شەكارا ماڭىنداعى سودىرلاردى جاسىرىپ وتىر دەپ ايىپتاسا، تاليبان بۇل ايىپتاۋلاردى جوققا شىعارۋدا.
بىتىمگە كەلۋ ماقساتىندا جاريالانعان 48 ساعاتتىق اتىستى توقتاتۋ مەرزىمى 17 قازاننىڭ كەشىندە اياقتالعان. ارادا بىرنەشە ساعات وتكەن سوڭ پاكىستان اۋعانستاننىڭ پاكتيكا پروۆينتسياسىنداعى ۋرگۋن جانە بارمال اۋداندارىنا اۋە سوققىسىن جاساعان.
قۇرباندار تۋرالى رەسمي اقپارات ازىرگە جاريالانبادى.
ەسكە سالايىق، اۋعانستان مەن پاكىستان اراسىنداعى قارۋلى قاقتىعىستار 12 قازان كۇنى تۇندە باستالعان بولاتىن.
