تاجىكستاننىڭ پرەزيدەنتى ەمومالي راحمون ءوزىنىڭ حاتلون وبلىسىنا ساپارى كەزىندە قاجىلاردى سىنعا الىپ، ۋمرا مەن قاجىلىقتى ورىنداۋدى "ەلىكتەۋ جانە فاناتيزم" دەپ اتادى. باسشىنىڭ ايتۋىنشا، سوڭعى كەزدەرى قاجىلىققا بارۋ وتباسىلىق باسەكەگە، جارىسقا اينالعان، دەپ حابارلايدى "ادىرنا" ۇلتتىق پورتالى islamnews سايتىنا سىلتەمە كورسەتە وتىرىپ.
"سوڭعى كەزدەرى قاجىلىق، ونىڭ ىشىندە كىشى قاجىلىق ەلىمىزدىڭ كەي ايماقتارىنداعى تۇرعىنداردىڭ اراسىندا مىندەتتى ءىس-شاراعا، ءتىپتى وتباسىلىق جارىسقا، تۋريزم مەن ساۋدانىڭ ءبىر تۇرىنە اينالعان", - دەدى ەمومالي راحمون.
تاجىكستان باسشىسى مەملەكەتىندەگى الەۋمەتتىك كورسەتكىشتەرگە يەك ارتىپ، قاجىلىققا باراتىنداردىڭ ءبىر اۋىق تۇرمىس-تىرشىلىگىن دە ەسكە الىپ قويۋعا شاقىردى. پرەزيدەنتتىڭ پىكىرىنشە، قاجىلىققا باراردان بۇرىن حالقى جەسىر مەن جەتىمگە جار بولىپ، بار قارجىسىن بالا تاربيەسى مەن بىلىمىنە شاشقان دۇرىس.
"كورسەتكىشتەرگە سۇيەنسەك، قاجىلىققا باراتىن، ءتىپتى وزىمەن بىرگە سابيلەر مەن جاسوسپىرىمدەردى دە الا كەتەتىن ادامدار قاجىلىقتىڭ ءراسىمى نەدەن قۇرالاتىنىن، وتباسىلارىنىڭ، بالالارىنىڭ، تۋىستارىنىڭ تۇرمىس-تىرشىلىگى قانداي ەكەندىگى تۋرالى ويلانبايدى", – دەپ اتاپ ءوتتى ول.
"قاجىلىققا باراردان بۇرىن جەرلەستەرىمىز وسى ماسەلەلەر مەن قازىرگى زاماننىڭ احۋالى جايلى ازداپ وي قوزعاپ، ماڭداي تەرمەن تاپقان اقشاسىن بالانىڭ تاربيەسى مەن وقۋىنا جۇمساپ، ومىردەگى قاجەتتىلىكتەردى قاناعاتتاندىرىپ، جەتىمدەرگە، مۇگەدەكتەرگە، مۇقتاجدارعا، كەدەيلەرگە كومەكتەسىپ قانا قاجىلىققا بارۋ كەرەك ەكەنىن تاعى ءبىر مارتە اتاپ وتەمىن", - دەپ تۇيىندەدى تاجىكستان پرەزيدەنتى.
ەستەرىڭىزگە سالا كەتەيىك، تاجىكستاننىڭ "ازاتتىعى" 2017 جىلى ەمومالي راحموننىڭ الەمنىڭ ەڭ ىقپالدى 500 مۇسىلمانى تىزىمىنە كىرگەنى جايلى جازعان ەدى. تاجىكستان تۇرعىندارىنىڭ شامامەن 99 پايىزىن مۇسىلماندار قۇرايدى.
"ادىرنا" ۇلتتىق پورتالى
