ماڭعىستاۋدا ۇقك شەكارا قىزمەتىنىڭ قىزمەتكەرى جالعان نەكە ارقىلى مەملەكەتتەن 50 ملن تەڭگە كولەمىندە تۇرعىن ءۇي تولەمدەرىن العانى ءۇشىن سوتتالدى، دەپ حابارلايدى "ادىرنا" ۇلتتىق پورتالى دياپازونعا سىلتەپ.
سوت الدىندا ماڭعىستاۋ وبلىسى بويىنشا شەكارا قىزمەتى دەپارتامەنتىنىڭ كونتربارلاۋ جانە بارلاۋ قىزمەتى باسقارماسىنىڭ اسا ماڭىزدى ىستەر جونىندەگى اعا جەدەل ۋاكىلى، 45 جاستاعى ا.ك. جاۋاپ بەرگەن. ول الاياقتىق جاسادى جانە مەملەكەتتىك تولەم الۋ ماقساتىندا وتباسى قۇرامىن جاساندى تۇردە كوبەيتتى دەپ ايىپتالعان. ءىس ماتەريالدارىنا سايكەس، اسكەري قىزمەتشى ايەلىنىڭ تۋىسىنىڭ جۇبايىن اجىراسىپ، وزىمەن نەكەگە تۇرۋعا كوندىرگەن. ول ايەلگە 3 ملن تەڭگە بەرۋگە ۋادە بەرگەن. ءتورت بالانىڭ اناسى ۇسىنىسقا كەلىسىپ، كۇيەۋىمەن اجىراسىپ، اسكەري قىزمەتشىمەن نەكەسىن رەسمي تۇردە تىركەگەن.
وسىدان كەيىن ەر ادام ايەلدىڭ ءتورت بالاسىنىڭ تۋ تۋرالى كۋالىكتەرىن نوتاريۋس ارقىلى راستاتىپ، وزگە دە قۇجاتتارمەن بىرگە شەكارا قىزمەتىنىڭ تۇرعىن ءۇي كوميسسياسىنا تاپسىرعان. قۇجاتتار نەگىزىندە بىرنەشە ايدان كەيىن ونىڭ بانك شوتىنا وتباسى قۇرامىن ەسكەرە وتىرىپ، 50 ملن تەڭگە كولەمىندە تۇرعىن ءۇي تولەمى اۋدارىلعان. كەيىن اسكەري قىزمەتشى باۋىرىنا تيەسىلى پاتەردى ساتىپ الۋ تۋرالى شارت راسىمدەگەن. ناتيجەسىندە «ساتۋشىنىڭ» شوتىنا 50,5 ملن تەڭگە تۇسكەن. قاراجات كەيىن قولما-قول اقشاعا اينالدىرىلىپ، باسقا بانكتەگى اسكەري قىزمەتشىنىڭ شوتىنا قايتا اۋدارىلعان. ونىڭ 3 ملن تەڭگەسىن ول جالعان نەكەگە تۇرعان ايەلگە بەرگەن. كەيىن ولاردىڭ نەكەسى بۇزىلعان.
سوت وتىرىسىندا ايىپتالۋشى كىناسىن مويىنداماعان. ول ايەلمەن چات ارقىلى تانىسقانىن جانە ولاردىڭ اراسىندا قارىم-قاتىناس ورناعانىن ايتقان. ونىڭ سوزىنشە، نەكە شىنايى بولعان، الايدا ەرلى-زايىپتىلار بىرگە تۇرماعان، سەبەبى ايەلدىڭ بالالارى مەكتەپتى اياقتاعانشا كۇتكەن. سونداي-اق سوتتالۋشى تۇرعىن ءۇي تولەمدەرىن زاڭ تالاپتارىنا سايكەس العانىن مالىمدەگەن. ونىڭ ايتۋىنشا، كەيىن ءبىرىنشى ايەلى جۇكتى بولعانىن جاڭا جۇبايى بىلگەننەن كەيىن ارالارىندا تۇسىنىسپەۋشىلىك تۋىنداپ، نەكە بۇزىلعان. كەيىن ول ءبىرىنشى ايەلىمەن قايتا نەكەلەسكەن.
الايدا ءتورت بالانىڭ اناسى سوتتا ايىپتالۋشىمەن جاقىن قارىم-قاتىناستا بولماعانىن جانە بىرگە تۇرماعانىن ايتىپ، نەكەنىڭ جالعان بولعانىن راستاعان. ونىڭ سوزىنشە، نەكەنى راسىمدەۋگە ونى ايىپتالۋشى مەن ونىڭ ايەلى كوندىرگەن. ايەل باستاپقىدا بۇل ارەكەت ولاردىڭ زەينەتاقى جيناقتارىن الۋىنا قاجەت دەپ ويلاعان. ول 50 ملن تەڭگە كولەمىندەگى تۇرعىن ءۇي تولەمى تۋرالى تەرگەۋ بارىسىندا عانا بىلگەنىن ايتىپ، كەيىن اسكەري قىزمەتشىگە قاتىستى ارىز جازعان. ايەل وزىنە «كومەگى ءۇشىن» 3 ملن تەڭگە بەرىلگەنىن جانە بۇل قاراجاتتى قارىزدارى مەن نەسيەلەرىن وتەۋگە جۇمساعانىن راستاعان.
اسكەري سوت نەكەنىڭ جالعان ەكەنىن انىقتاپ، مەملەكەتتىك قاراجاتتى الۋ ارەكەتىن الاياقتىق دەپ تانىعان. سوت ا.ك.-نى التى جىلعا باس بوستاندىعىنان ايىردى. سونىمەن قاتار وعان مەملەكەتكە كەلتىرىلگەن شىعىندى وتەۋ مىندەتتەلدى. بۇدان بولەك، سوت ۇكىمىمەن ول پودپولكوۆنيك اسكەري اتاعىنان ايىرىلۋعا ءتيىس.
سوت ۇكىمى ازىرگە زاڭدى كۇشىنە ەنگەن جوق.
