فوتو: Straits Sights / Twitter
تۇركيا قارا تەڭىزگە داردانەلل بۇعازى ارقىلى وتەتىن كوممەرتسيالىق كەمەلەردىڭ قوزعالىسىن شەكتەي باستادى. بۇعان ساۋدا فلوتىنا جاسالعان درون شابۋىلدارىنىڭ جيىلەۋى سەبەپ بولعان. بۇل تۋرالى Bloomberg اگەنتتىگى جازدى، دەپ حابارلايدى "ادىرنا".
تۇركيانىڭ جاعالاۋ قاۋىپسىزدىگى باس باسقارماسى نوۆوروسسيسك پورتىنا بەت العان بىرنەشە كەمەگە اتالعان باعىت بويىنشا جۇرۋگە رۇقسات بەرىلمەيتىنىن نەمەسە وتىنىمدەردى قاراۋعا قوسىمشا ۋاقىت قاجەت ەكەنىن حابارلاعان.
نوۆوروسسيسك — رەسەيدىڭ مۇناي مەن استىق ەكسپورتىنداعى ماڭىزدى پورتتارىنىڭ ءبىرى.
Bloomberg دەرەككوزدەرىنىڭ مالىمەتىنشە، شەكتەۋلەر ۋكراينا پورتتارىنا باعىت العان كەمەلەرگە دە اسەر ەتكەن. الايدا انكارا بۇل شەشىمنىڭ ناقتى سەبەبىن رەسمي تۇردە تۇسىندىرمەگەن.
سونىمەن قاتار كەمە قوزعالىسىن باقىلاۋ دەرەكتەرى تۇركيا مەن بولگاريا پورتتارىنا بەت العان كەمەلەردىڭ سولتۇستىك باعىتتاعى قوزعالىسىن جالعاستىرعانىن كورسەتكەن.
تۇركيانىڭ بۇل شەشىمىنە دەيىن قارا تەڭىزدەگى ازاماتتىق كەمەلەرگە بىرنەشە شابۋىل جاسالعان.
1 تامىزدا كونتەينەر تاسىمالداۋشى «يانينا» كەمەسىنە دروندار شابۋىل جاساعان.
3 تامىزدا سامسۋننان نوۆوروسسيسكىگە كوكونىس پەن جەمىس تاسىمالداپ بارا جاتقان تۇركيالىق Nadezhda كەمەسىنە شابۋىل جاسالىپ، بورتتا ءورت شىققان. بىرنەشە ەكيپاج مۇشەسى زارداپ شەككەن.
ال 7 تامىزدا نوۆوروسسيسك جاعالاۋىندا تۇركيالىق MV Güllük قۇرعاق جۇك كەمەسىنە شابۋىل جاسالعان.
بۇعان دەيىن، 4 تامىزدا، تۇركيا سىرتقى ىستەر مينيسترلىگى رەسەي مەن ۋكراينانى تەڭىزدەگى كەمە قاتىناسىنىڭ قاۋىپسىزدىگىن قامتاماسىز ەتۋ ءۇشىن «شۇعىل تۇردە ناقتى شارالار قابىلداۋعا» شاقىرعان. انكارا قاقتىعىستىڭ ودان ءارى ءورشۋى ازىق-تۇلىك قاۋىپسىزدىگىن قوسا العاندا، كوپجاقتى سالدارعا اكەلۋى مۇمكىن ەكەنىن ەسكەرتكەن.
تۇركيا داردانەلل بۇعازىن تولىق جابا الا ما؟
قۇقىقتىق تۇرعىدان تۇركيا كوممەرتسيالىق كەمەلەر ءۇشىن داردانەلل بۇعازىن تولىق جابا المايدى.
بۇعازدار ارقىلى ءوتۋ ءتارتىبى 1936 جىلعى مونتريو كونۆەنتسياسىمەن رەتتەلەدى. كونۆەنتسيا تۇركيا سوعىسقا قاتىسۋشى تاراپ بولماعان جاعدايدا، كەز كەلگەن ەلدىڭ تۋىن كوتەرگەن جانە كەز كەلگەن جۇك تاسىمالدايتىن ساۋدا كەمەلەرىنىڭ بۇعازدار ارقىلى ەركىن ءوتۋ قۇقىعىن ساقتايدى.
الايدا تۇركيا ءوزى سوعىس جاعدايىندا تۇرعان مەملەكەتتەردىڭ كوممەرتسيالىق كەمەلەرىنە شەكتەۋ قويا الادى. بۇل اسكەري كەمەلەرگە قاتىستى تالاپتاردان وزگەشە. انكارا اسكەري كەمەلەردىڭ قارا تەڭىزگە ءوتۋىن 2022 جىلى-اق شەكتەگەن بولاتىن.
وسىلايشا، قازىرگى شەكتەۋلەر قارا تەڭىزدەگى ازاماتتىق كەمە قاتىناسىنىڭ قاۋىپسىزدىگىنە بايلانىستى ەنگىزىلىپ وتىرعانىمەن، تۇركيانىڭ بۇعازداردى تولىق جابۋى حالىقارالىق قۇقىق تۇرعىسىنان بىرقاتار شەكتەۋلەرگە بايلانىستى مۇمكىن ەمەس.
