Foto: Straits Sights / Twitter
Türkiia Qara teŋızge Dardanell būǧazy arqyly ötetın kommersiialyq kemelerdıŋ qozǧalysyn şektei bastady. Būǧan sauda flotyna jasalǧan dron şabuyldarynyŋ jiıleuı sebep bolǧan. Būl turaly Bloomberg agenttıgı jazdy, dep habarlaidy "Adyrna".
Türkiianyŋ Jaǧalau qauıpsızdıgı bas basqarmasy Novorossiisk portyna bet alǧan bırneşe kemege atalǧan baǧyt boiynşa jüruge rūqsat berılmeitının nemese ötınımderdı qarauǧa qosymşa uaqyt qajet ekenın habarlaǧan.
Novorossiisk — Reseidıŋ mūnai men astyq eksportyndaǧy maŋyzdy porttarynyŋ bırı.
Bloomberg derekközderınıŋ mälımetınşe, şekteuler Ukraina porttaryna baǧyt alǧan kemelerge de äser etken. Alaida Ankara būl şeşımnıŋ naqty sebebın resmi türde tüsındırmegen.
Sonymen qatar keme qozǧalysyn baqylau derekterı Türkiia men Bolgariia porttaryna bet alǧan kemelerdıŋ soltüstık baǧyttaǧy qozǧalysyn jalǧastyrǧanyn körsetken.
Türkiianyŋ būl şeşımıne deiın Qara teŋızdegı azamattyq kemelerge bırneşe şabuyl jasalǧan.
1 tamyzda konteiner tasymaldauşy «Iаnina» kemesıne drondar şabuyl jasaǧan.
3 tamyzda Samsunnan Novorossiiskıge kökönıs pen jemıs tasymaldap bara jatqan türkiialyq Nadezhda kemesıne şabuyl jasalyp, bortta ört şyqqan. Bırneşe ekipaj müşesı zardap şekken.
Al 7 tamyzda Novorossiisk jaǧalauynda türkiialyq MV Güllük qūrǧaq jük kemesıne şabuyl jasalǧan.
Būǧan deiın, 4 tamyzda, Türkiia Syrtqy ıster ministrlıgı Resei men Ukrainany teŋızdegı keme qatynasynyŋ qauıpsızdıgın qamtamasyz etu üşın «şūǧyl türde naqty şaralar qabyldauǧa» şaqyrǧan. Ankara qaqtyǧystyŋ odan ärı örşuı azyq-tülık qauıpsızdıgın qosa alǧanda, köpjaqty saldarǧa äkeluı mümkın ekenın eskertken.
Türkiia Dardanell būǧazyn tolyq jaba ala ma?
Qūqyqtyq tūrǧydan Türkiia kommersiialyq kemeler üşın Dardanell būǧazyn tolyq jaba almaidy.
Būǧazdar arqyly ötu tärtıbı 1936 jylǧy Montrio konvensiiasymen retteledı. Konvensiia Türkiia soǧysqa qatysuşy tarap bolmaǧan jaǧdaida, kez kelgen eldıŋ tuyn kötergen jäne kez kelgen jük tasymaldaityn sauda kemelerınıŋ būǧazdar arqyly erkın ötu qūqyǧyn saqtaidy.
Alaida Türkiia özı soǧys jaǧdaiynda tūrǧan memleketterdıŋ kommersiialyq kemelerıne şekteu qoia alady. Būl äskeri kemelerge qatysty talaptardan özgeşe. Ankara äskeri kemelerdıŋ Qara teŋızge ötuın 2022 jyly-aq şektegen bolatyn.
Osylaişa, qazırgı şekteuler Qara teŋızdegı azamattyq keme qatynasynyŋ qauıpsızdıgıne bailanysty engızılıp otyrǧanymen, Türkiianyŋ būǧazdardy tolyq jabuy halyqaralyq qūqyq tūrǧysynan bırqatar şekteulerge bailanysty mümkın emes.
