اقتاۋ قالاسىنىڭ تۇرعىنى جۇلدىز ازانوۆا 13 جاستاعى ۇلىنىڭ ولىمىنە قاتىستى سۇراقتارىنا جاۋاپ الۋ ءۇشىن استاناعا كەلدى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
ول دەنساۋلىق ساقتاۋ ءمينيسترى اقمارال النازاروۆامەن جەكە كەزدەسۋدى سۇراعان.
ايەلدىڭ ايتۋىنشا، ول 6 تامىزدا تاڭەرتەڭ استاناعا ۇشىپ كەلگەن. الايدا مينيسترمەن كەزدەسۋدىڭ ناقتى ۋاقىتى ازىرگە بەلگىلەنبەگەن. ايەلگە الداعى سارسەنبىدە ناقتى جاۋاپ بەرىلەتىنى ايتىلعان.
باق دەرەگىنشە، بۇعان دەيىن ازانوۆاعا دەنساۋلىق ساقتاۋ ۆيتسە-ءمينيسترى ماناس رامازانوۆپەن كەزدەسۋ ۇسىنىلعان. الايدا ول بۇل ۇسىنىستان باس تارتىپ، ءمينيستردىڭ وزىمەن سويلەسكىسى كەلەتىنىن جەتكىزدى.
ەسكە سالايىق، 13 جاستاعى بالا 2026 جىلدىڭ 17 قاڭتارىندا ءوزىن ناشار سەزىنە باستاعان. اناسىنىڭ ايتۋىنشا، بالانىڭ ءىشى قاتتى اۋىرىپ، ونى اپپەنديتسيتكە كۇدىكپەن ماڭعىستاۋ وبلىستىق كوپبەيىندى بالالار اۋرۋحاناسىنا جەتكىزگەن. بىرنەشە ساعات باقىلاۋدان كەيىن اپپەنديتسيت دياگنوزى راستالماي، ءجاسوسپىرىم ۇيىنە جىبەرىلگەن. الايدا كەيىن ونىڭ ءىشىنىڭ اۋىرۋى باسىلماي، دەنە قىزۋى كوتەرىلگەن.
اناسىنىڭ سوزىنشە، ودان كەيىن وتباسى بىرنەشە رەت مەديتسينالىق كومەككە جۇگىنگەن. ءجاسوسپىرىم ەمحاناعا، بالالار اۋرۋحاناسىنا جانە جۇقپالى اۋرۋلار اۋرۋحاناسىنا بارعان. كەيىن بالا اۋرۋحاناعا جاتقىزىلىپ، وعان وپەراتسيا جاسالعان. وتا كەزىندە سوقىرىشەكتىڭ جارىلىپ كەتكەنى جانە ينفەكتسيانىڭ قۇرساق قۋىسىنا تاراعانى انىقتالعان. دارىگەرلەر سوقىرىشەكپەن قاتار ىشەكتىڭ ءبىر بولىگىن دە الىپ تاستاۋعا ءماجبۇر بولعان. وپەراتسيا بارىسىندا ءجاسوسپىرىمنىڭ جۇرەگى بىرنەشە رەت توقتاعان. 19 اقپاندا ول سانيتارلىق اۆياتسيامەن الماتىداعى پەدياتريا جانە بالالار حيرۋرگياسى عىلىمي ورتالىعىنا جەتكىزىلگەن. دارىگەرلەر ونىڭ ءومىرىن ساقتاپ قالۋ ءۇشىن ەكى ايعا جۋىق ەم جۇرگىزگەن.
الايدا 13 ساۋىردە ءجاسوسپىرىم قايتىس بولدى. ۇلىنىڭ ولىمىنەن كەيىن جۇلدىز ازانوۆا قازاقستان پرەزيدەنتى قاسىم-جومارت توقاەۆقا جانە دەنساۋلىق ساقتاۋ مينيسترلىگىنە ۇندەۋ جولداعان.
