قازاقستاندا 2-4-سىنىپ وقۋشىلارى ءۇشىن ءبولىم بويىنشا جيىنتىق باعالاۋ (بجب) جانە توقساندىق جيىنتىق باعالاۋدى (تجب) الىپ تاستاۋ ۇسىنىلدى، دەپ حابارلايدى "ادىرنا" ۇلتتىق پورتالى.
ءتيىستى وزگەرىستەر وقۋ-اعارتۋ ءمينيسترىنىڭ بۇيرىق جوباسىندا قاراستىرىلعان. قۇجات «اشىق نقا» پورتالىندا جاريالانىپ، 21 تامىزعا دەيىن قوعامدىق تالقىلاۋعا شىعارىلدى.
بۇيرىق جوباسىنا سايكەس، 2-4-سىنىپ وقۋشىلارىنىڭ وقۋ جەتىستىكتەرىن باعالاۋ قالىپتاستىرۋشى باعالاۋ، تاقىرىپتىق جانە قورىتىندى باقىلاۋ ارقىلى جۇرگىزىلەدى. ولاردىڭ ناتيجەلەرى توقساندىق باعا قويۋ كەزىندە ەسكەرىلەدى.
قولدانىستاعى تالاپتارعا سايكەس، باستاۋىش سىنىپ وقۋشىلارىنىڭ ءبىلىمى ديكتانت، مازمۇنداما، باقىلاۋ، پراكتيكالىق جانە شىعارماشىلىق جۇمىستار ارقىلى تەكسەرىلەدى.
ال 5-11 (12)-سىنىپتاردا باعالاۋ جۇيەسىن وزگەرتۋ جوسپارلانباعان. بۇل سىنىپتاردا بجب مەن تجب بۇرىنعى تارتىپپەن ساقتالادى. 1-سىنىپ وقۋشىلارىنا باعا قويىلمايدى.
وقۋ-اعارتۋ مينيسترلىگىنىڭ مالىمەتىنشە، باستاما اتا-انالار مەن پەداگوگتەردىڭ ۇسىنىستارى نەگىزىندە ازىرلەنگەن. ىبىراي التىنسارين اتىنداعى ۇلتتىق ءبىلىم اكادەمياسىمەن بىرلەسىپ جۇرگىزىلگەن تالداۋ بارىسىندا بجب مەن تجب باستاۋىش سىنىپ وقۋشىلارىنىڭ وقۋ جەتىستىكتەرىن تولىق كورسەتە المايتىنى انىقتالعان.
سونىمەن قاتار جيىنتىق باعالاۋلاردىڭ وقۋشىلارعا قوسىمشا وقۋ جانە پسيحولوگيالىق جۇكتەمە تۇسىرەتىنى ەسكەرىلگەن.
بۇيرىق جوباسى قوعامدىق تالقىلاۋ اياقتالعاننان كەيىن بەلگىلەنگەن تارتىپپەن قارالادى.
