الماتى قالاسىنداعى ەتنومادەني بىرلەستىكتەردىڭ وكىلدەرى مەگاپوليس تۇرعىندارىنا ۇندەۋ جاساپ، ماڭىزدى قوعامدىق-ساياسي ناۋقاننان شەت قالماۋعا شاقىردى. ولار بەلسەندى ازاماتتىق ۇستانىم، سانالى تاڭداۋ جانە ءاربىر ادامنىڭ قاتىسۋى مىقتى، تۇراقتى ءارى ءبىرتۇتاس مەملەكەتتىڭ نەگىزىن قالايتىنىن اتاپ ءوتتى.
بىرلەستىك وكىلدەرىنىڭ ايتۋىنشا، قازاقستان ءاردايىم ەتنوسارالىق كەلىسىم مەن ءوزارا قۇرمەتتىڭ ۇلگىسى بولىپ كەلەدى. ەلىمىزدە ءتۇرلى ۇلت وكىلدەرى بەيبىت ءومىر ءسۇرىپ، ءوز داستۇرلەرىن ساقتاي وتىرىپ، ورتاق بولاشاقتى بىرگە قالىپتاستىرۋدا. ولاردىڭ پىكىرىنشە، الداعى سايلاۋ قوعامنىڭ بىرلىگى مەن ازاماتتاردىڭ ەل دامۋىنا بەلسەندى اتسالىسۋعا دايىن ەكەندىگىنىڭ تاعى ءبىر دالەلى بولماق.
الماتى قالالىق ورىس مادەني ورتالىعىنىڭ توراعاسى ۆسەۆولود لۋكاشەۆ سايلاۋدىڭ مەملەكەت ءۇشىن دە، ءاربىر ازامات ءۇشىن دە ماڭىزدى كەزەڭ ەكەنىن اتاپ ءوتتى.
«بارشامىزدى سايلاۋ كۇتىپ تۇر. 23 تامىز كۇنى ءبارىمىز بىرگە سايلاۋعا بارامىز. ويتكەنى ءبىز جاڭا قازاقستان ءۇشىن تاڭداۋ جاسايمىز»، – دەدى ۆسەۆولود لۋكاشەۆ.
ۇندەۋگە قاتىسۋشىلار قازاقستاننىڭ باستى كۇشى حالىقتىڭ بىرلىگىندە ەكەنىنە سەنىمدى. ۇلتىنا، جاسىنا، ماماندىعىنا نەمەسە ءدىني سەنىمىنە قاراماستان، ەل تۇرعىندارىنىڭ بارلىعىن مەملەكەتىمىزدىڭ ودان ءارى دامۋىنا دەگەن ورتاق جاۋاپكەرشىلىك بىرىكتىرەدى. ولاردىڭ ايتۋىنشا، ءاربىر داۋىس ماڭىزدى، ال سايلاۋعا قاتىسۋ – ءوز ەلىنە، ونىڭ تاريحىنا جانە كەلەر ۇرپاققا دەگەن قۇرمەتتىڭ كورىنىسى.
ەتنومادەني بىرلەستىكتەردىڭ وكىلدەرى بۇگىندە قوعامدىق كەلىسىم، سەنىم جانە ءوزارا قولداۋ احۋالىن ساقتاۋ اسا ماڭىزدى ەكەنىن ايتتى. ولار جوعارى ازاماتتىق بەلسەندىلىك قازاقستاندىق قوعامنىڭ كەمەلدىگىن، دەموكراتيالىق قۇندىلىقتارعا ادالدىعىن جانە تۇراقتىلىقتى، بەيبىتشىلىكتى ءارى جاسامپاز دامۋدى نىعايتۋعا دەگەن ۇمتىلىسىن كورسەتەتىنىنە سەنىم ءبىلدىردى.
ۇندەۋ سوڭىندا ولار الماتى تۇرعىندارىن 23 تامىز كۇنى سايلاۋ ۋچاسكەلەرىنە كەلىپ، سانالى تاڭداۋ جاساپ، ەل بولاشاعىنا ءوز ۇلەسىن قوسۋعا شاقىردى. ولاردىڭ پىكىرىنشە، ءاربىر ازاماتتىڭ قاتىسۋى ءال-اۋقات، بىرلىك جانە جاۋاپكەرشىلىك باستى قۇندىلىقتار سانالاتىن قۋاتتى مەملەكەتتىڭ نەگىزىن قالايدى.
