جۇرگىزىلگەن تەكسەرۋ ناتيجەلەرى بويىنشا الماتى قالاسىنىڭ اۋماعىندا شەكتى رۇقسات ەتىلگەن شىعارىندىلاردىڭ (شرش) جيىنتىق تومىن جاساۋ بارىسىندا تاعام دايىنداۋ مەن جىلىتۋ ءۇشىن قاتتى وتىن پايدالاناتىن 509 قوعامدىق تاماقتانۋ نىسانى (كاۋاپحانا) جانە 81 كوممەرتسيالىق مونشا انىقتالدى. بۇل تۋرالى الماتى قالاسىنىڭ ەكولوگيا جانە قورشاعان ورتا باسقارماسىنىڭ وكىلدەرى.
باسقارما وكىلدەرى كوپپاتەرلى تۇرعىن ۇيلەردە جانە وزگە دە عيماراتتاردا ورنالاسقان قوعامدىق تاماقتانۋ نىساندارىندا قاتتى وتىن پايدالانۋعا قوعامدىق تاماقتانۋ ورىندارىنا قويىلاتىن سانيتارلىق-ەپيدەميولوگيالىق تالاپتارعا سايكەس تىيىم سالىنعانىن ەسكە سالدى. سونىمەن قاتار قالا اۋماعىندا مانگالداردى پايدالانۋ جانە مونشا سالۋ كەزىندە ءورت قاۋىپسىزدىگى تالاپتارىنىڭ بۇزىلۋى تىركەلىپ وتىر. بۇل ازاماتتاردىڭ ءومىرى مەن دەنساۋلىعىنا قاۋىپ ءتوندىرىپ قانا قويماي، اتموسفەرالىق اۋانىڭ قوسىمشا لاستانۋىنا اكەلەدى.
وسىعان بايلانىستى 2025 جىلى 27 قاراشادان باستاپ «Eco Almaty» جشس قىزمەتكەرلەرى قاتتى وتىن پايدالاناتىن نىسانداردى باقىلاۋ جۇمىستارىن جۇرگىزىپ كەلەدى. اتالعان جۇمىس اياسىندا 182 قوعامدىق تاماقتانۋ نىسانىنىڭ يەسىمەن جانە 39 مونشا يەسىمەن گاز جابدىعىنا كوشۋ، سونداي-اق شىعارىندىلاردى تازالاۋ جۇيەلەرىن ورناتۋ قاجەتتىلىگى بويىنشا ءتۇسىندىرۋ جۇمىسى جۇرگىزىلدى. سونىمەن قاتار 23 قوعامدىق تاماقتانۋ نىسانىندا كورىكتەندىرۋ قاعيدالارىن بۇزۋ فاكتىلەرى انىقتالدى.
زاڭبۇزۋشىلارعا قاتىستى پوليتسيا دەپارتامەنتىنىڭ قۇزىرەتى اياسىندا شارالار قابىلدانىپ، قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 505-بابى بويىنشا حاتتامالار تولتىرىلدى. سونداي-اق ماتەريالدار ۋاكىلەتتى ورگاندارعا – سانيتارلىق-ەپيدەميولوگيالىق باقىلاۋ دەپارتامەنتىنە، توتەنشە جاعدايلار دەپارتامەنتىنە (تجد) جانە ەكولوگيا دەپارتامەنتىنە جولداندى.
بۇدان بولەك، الماتى قالاسىنىڭ سانيتارلىق-ەپيدەميولوگيالىق باقىلاۋ دەپارتامەنتى كوزگە كورىنەتىن ءتۇتىن شىعارىندىلارىمەن قاتار قىزمەتىنە بايلانىستى 12 كاۋاپحاناعا جوسپاردان تىس تەكسەرۋ جۇرگىزدى. سونىڭ ناتيجەسىندە 10 ەكولوگيالىق قۇقىق بۇزۋشىلىق فاكتىسى انىقتالىپ، 7 نۇسقاما بەرىلدى، 2 ماتەريال سوتقا جولداندى. جالپى سوماسى 1 887 360 تەڭگە بولاتىن 8 اكىمشىلىك شارا قولدانىلدى.
باقىلاۋ جۇمىستارى جالعاسىپ كەلەدى.
