جاڭا قاراعاندى – جەزقازعان رەسپۋبليكالىق اۆتوجولىنىڭ جاڭاارقادان قاراعاندى باعىتىنا قاراي سوزىلعان ۋچاسكەسىندە قۇرىلىس جۇمىستارىنىڭ دايىندىق كەزەڭى قارقىندى جالعاسىپ جاتىر. قازىرگى ۋاقىتتا مەردىگەر ۇيىمدار بولاشاق اۆتوجولدىڭ نەگىزىن دايىنداۋ جۇمىستارىنا كىرىسكەن.
جاڭا رەسپۋبليكالىق ماڭىزى بار اۆتوجولدىڭ جالپى ۇزىندىعى 457 شاقىرىمدى قۇرايدى. ونىڭ 122 شاقىرىمى قاراعاندى وبلىسىنىڭ اۋماعى ارقىلى وتەدى. II تەحنيكالىق ساناتقا جاتاتىن ەكى جولاقتى جاڭا تراسسا قولدانىستاعى جولمەن قاتار سالىنىپ جاتىر جانە پايدالانۋعا بەرىلگەننەن كەيىن قاۋىپسىزدىك پەن ساپاعا قويىلاتىن زاماناۋي تالاپتارعا تولىق سايكەس بولادى.
بۇگىندە نىساندا قۇرىلىس جۇمىستارىنىڭ دايىندىق كەزەڭى جۇرگىزىلۋدە. مەردىگەرلەر جەكەلەگەن ۋچاسكەلەردە قۇنارلى توپىراق قاباتىن الىپ تاستاپ، جول توسەمىنىڭ نەگىزىن جوسپارلاۋ جانە نىعىزداۋ جۇمىستارىن اتقارۋدا. سونىمەن قاتار گەولوگيالىق جانە گەودەزيالىق ىزدەستىرۋ جۇمىستارى جۇرگىزىلىپ جاتىر.
بۇعان قوسا، ۆاحتالىق قالاشىقتار مەن وندىرىستىك بازالار ورنالاساتىن الاڭدار ازىرلەنىپ، قۇرىلىس تەحنيكاسىن، جابدىقتار مەن مامانداردى جۇمىلدىرۋ جالعاسۋدا.
جوبانىڭ تاپسىرىس بەرۋشىسى – «قازاۆتوجول» ۇك» اق.
جوبانىڭ باستى ەرەكشەلىگى – DBM مودەلىنىڭ قولدانىلۋى. بۇل مودەلگە سايكەس مەردىگەر نىساننىڭ بۇكىل ومىرلىك تسيكلىنە جاۋاپ بەرەدى: جوبالاۋ مەن قۇرىلىس جۇمىستارىنان باستاپ، جول پايدالانۋعا بەرىلگەننەن كەيىنگى جەتى جىل بويى ونى كۇتىپ-ۇستاۋعا دەيىن. مۇنداي ءتاسىل قۇرىلىس جۇمىستارىنىڭ ساپاسىن ارتتىرۋعا، جوبانىڭ قىمباتتاۋى مەن مەرزىمىنىڭ كەشىگۋ تاۋەكەلدەرىن بارىنشا ازايتۋعا، سونداي-اق جوبانى ءتيىمدى جۇزەگە اسىرۋعا مۇمكىندىك بەرەدى.
قاراعاندى – جەزقازعان اۆتوجولىن قايتا جاڭعىرتۋ قازاقستاننىڭ كولىك ينفراقۇرىلىمى ءۇشىن ستراتەگيالىق ماڭىزعا يە. قۇرىلىس اياقتالعاننان كەيىن جاڭا تراسسا ەلىمىزدىڭ ورتالىق، سولتۇستىك جانە وڭتۇستىك وڭىرلەرىن ءوزارا بايلانىستىراتىن ماڭىزدى كولىك دالىزىنە اينالادى. سونىڭ ناتيجەسىندە جول قوزعالىسىنىڭ قاۋىپسىزدىگى ارتىپ، اۆتوجولدىڭ وتكىزۋ قابىلەتى ۇلعايادى، سونداي-اق تۇرعىندار مەن جۇك تاسىمالداۋشىلاردىڭ جول ءجۇرۋ ۋاقىتى ەداۋىر قىسقارادى.
اۆتوكولىك قوزعالىسىن اشۋ جەكەلەگەن ۋچاسكەلەردىڭ دايىن بولۋىنا قاراي كەزەڭ-كەزەڭىمەن جۇزەگە اسىرىلادى. ال جاڭا قاراعاندى – جەزقازعان اۆتوجولىنىڭ قۇرىلىسىن تولىق اياقتاۋ 2029 جىلعا جوسپارلانعان.
