قاراعاندى وبلىسىندا بيىل ينجەنەرلىك ينفراقۇرىلىمدى جاڭعىرتۋ بويىنشا 108 جوبا ىسكە اسىرىلادى. كوممۋنالدىق جەلىلەردىڭ 438 شاقىرىمىن قايتا جاڭعىرتىپ، جاڭادان سالۋ جوسپارلانعان.
جۇمىستاردىڭ نەگىزگى بولىگى سۋمەن جابدىقتاۋ جانە سۋ بۇرۋ جۇيەلەرىنە تيەسىلى – 237,3 شاقىرىم. تاعى 149,6 شاقىرىم ەلەكترمەن جابدىقتاۋ جەلىلەرىن، 51,3 شاقىرىم جىلۋمەن جابدىقتاۋ جەلىلەرىن قۇرايدى.
جوبالار بىردەن بىرنەشە باعىت بويىنشا جۇزەگە اسىرىلۋدا. 14 نىسان ەنەرگەتيكا جانە كوممۋنالدىق سەكتورلاردى جاڭعىرتۋدىڭ ۇلتتىق جوباسىنا ەنگىزىلگەن. 33 جوبا بيۋدجەت قاراجاتى ەسەبىنەن قارجىلاندىرىلسا، تاعى 61 جوبا تابيعي مونوپوليالار سۋبەكتىلەرىنىڭ ينۆەستيتسيالىق باعدارلامالارى اياسىندا ىسكە اسىرىلۋدا.
جۇمىستار تەك كوممۋنالدىق جەلىلەردى قامتىمايدى، ەنەرگەتيكا نىساندارىن دا جاڭعىرتۋ كوزدەلگەن. وڭىردە قازاندىقتار، تۋربينالار جانە باسقا دا جابدىقتار جوندەلىپ جاتىر. Qarmet-ءتىڭ جەو-2-دە جاڭا قازاندىق ىسكە قوسىلسا، توپار ماەس-ىندە تۋربينا اۋىستىرىلدى.
سونىمەن قاتار جاڭا ەنەرگەتيكالىق قۋاتتار قۇرىلىپ جاتىر. قاراعاندىدا جەو-3-ءتىڭ ەنەرگوبلوگىن، بالقاش جەو-دا جاڭا قازاندىق سالۋ جۇمىستارى جالعاسۋدا. ەكى جوبانى دا 2028 جىلى اياقتاۋ جوسپارلانعان.
كوممۋنالدىق ينفراقۇرىلىمدى جاڭعىرتۋ جۇمىستارى قاراعاندى، تەمىرتاۋ، شاحتينسك، اباي، ساران قالالارىندا جانە وبلىس اۋداندارىندا جۇرگىزىلۋدە. مۇندا تەك اعىمداعى جوندەۋ جۇمىستارى عانا ەمەس، جەلىلەردىڭ ەڭ توزعان ۋچاسكەلەرىن قايتا جاڭعىرتۋ دا كوزدەلگەن.
– بۇگىندە الداعى جىلىتۋ ماۋسىمىنا دايىندىققا ەرەكشە كوڭىل ءبولىنىپ وتىر. نەگىزگى جۇمىستار كەستەگە سايكەس جۇرگىزىلۋدە. ءبىزدىڭ مىندەتىمىز – قىس مەزگىلىندە تىرشىلىكتى قامتاماسىز ەتەتىن بارلىق جۇيەلەردىڭ سەنىمدى جۇمىس ىستەۋىن قامتاماسىز ەتۋ، – دەدى قاراعاندى وبلىسى اكىمىنىڭ ءبىرىنشى ورىنباسارى ازامات تايجانوۆ.
ونىڭ ايتۋىنشا، ينفراقۇرىلىمدى جاڭارتۋ جۇمىستارى كەلەسى جىلى دا جالعاسادى. ءوڭىردىڭ مىندەتى – جەلىلەردى قايتا جاڭعىرتۋ كولەمىن كەزەڭ-كەزەڭىمەن ۇلعايتىپ، كوممۋنالدىق ينفراقۇرىلىمنىڭ توزۋ دەڭگەيىن تومەندەتۋ.
– كوممۋنالدىق ينفراقۇرىلىم سەنىمدى جۇمىس ىستەمەيىنشە، ءوڭىردىڭ دامۋى، ينۆەستيتسيا تارتۋ جانە جاڭا جۇمىس ورىندارىن قۇرۋ تۋرالى ايتۋ مۇمكىن ەمەس. سوندىقتان بۇگىن ءبىز جەلىلەردى جوندەۋمەن عانا شەكتەلمەي، قاراعاندى وبلىسىنىڭ بولاشاقتاعى دامۋىنا نەگىز قالاپ جاتىرمىز، – دەپ اتاپ ءوتتى ازامات تايجانوۆ.
