قاراعاندى وبلىسىندا پوليتسيانىڭ قوعامدىق كومەكشىلەرى اراسىندا وبلىستىق بايقاۋ ءوتىپ، قالالىق جانە اۋىلدىق جەرلەردەگى ۇزدىك قوعامدىق كومەكشىلەر انىقتالدى.
قاراعاندى وبلىسى پوليتسيا دەپارتامەنتىندە قۇقىقتىق ءتارتىپتى قامتاماسىز ەتۋگە، ازاماتتاردىڭ قاۋىپسىزدىگىن قورعاۋعا جانە قوعامدا «زاڭ مەن ءتارتىپ» قاعيداتىن نىعايتۋعا ۇلەس قوسىپ جۇرگەن پوليتسيانىڭ قوعامدىق كومەكشىلەرى باس قوستى.
بايقاۋعا اۋداندار مەن قالالاردا وتكەن ىرىكتەۋ كەزەڭدەرىندە ءبىرىنشى ورىن العان 12 قوعامدىق كومەكشى قاتىسىپ، جىل بويى اتقارعان جۇمىستارى مەن قول جەتكىزگەن ناتيجەلەرىن كوميسسيا نازارىنا ۇسىندى.
ءىس-شارانى اشقان پوليتسيا دەپارتامەنتى باستىعىنىڭ ورىنباسارى جاسقايرات قايىروۆ قوعامدىق كومەكشىلەردىڭ قۇقىقتىق ءتارتىپتى قامتاماسىز ەتۋدەگى رولىنە توقتالدى.
«بۇگىندە وبلىس بويىنشا 394 پوليتسيانىڭ قوعامدىق كومەكشىسى بار. ولاردىڭ بەلسەندى قاتىسۋىمەن 30-دان استام قىلمىس پەن 600-دەن استام اكىمشىلىك قۇقىق بۇزۋشىلىق انىقتالدى. قوعامدىق كومەكشىلەر پوليتسيا قىزمەتكەرلەرىمەن بىرلەسە وتىرىپ، قۇقىق بۇزۋشىلىقتاردىڭ الدىن الۋعا جانە قوعامدىق ءتارتىپتى ساقتاۋعا ەلەۋلى ۇلەس قوسىپ كەلەدى. بۇل – بارشامىزعا ورتاق مىندەت»، – دەدى جاسقايرات قايىروۆ.
بايقاۋ بارىسىندا پوليتسيا دەپارتامەنتى قوعامدىق قاۋىپسىزدىك باسقارماسىنىڭ قىزمەتكەرلەرى قاتىسۋشىلاردىڭ جىل بويى اتقارعان جۇمىستارىن تانىستىرىپ، ولاردىڭ قۇقىق بۇزۋشىلىقتاردىڭ الدىن الۋ، قوعامدىق ءتارتىپتى ساقتاۋ جانە ازاماتتارمەن ءتۇسىندىرۋ جۇمىستارىن جۇرگىزۋ باعىتىنداعى قىزمەتىنە باعا بەردى.
پوليتسيانىڭ قوعامدىق كومەكشىلەرى – قۇقىقتىق ءتارتىپتى قامتاماسىز ەتۋدە پوليتسيا قىزمەتكەرلەرىنىڭ سەنىمدى سەرىكتەستەرىنىڭ ءبىرى. ولار ەلدى مەكەندەردەگى قوعامدىق احۋالدى باقىلاۋعا، قۇقىق بۇزۋشىلىقتاردىڭ الدىن الۋعا، ازاماتتارعا زاڭ تالاپتارىن تۇسىندىرۋگە جانە پوليتسياعا جەدەل اقپارات جەتكىزۋگە بەلسەندى اتسالىسادى.
ءىس-شارا بارىسىندا بايقاۋدىڭ بارلىق قاتىسۋشىلارىنا پوليتسيا دەپارتامەنتى باستىعىنىڭ العىس حاتتارى تابىستالىپ، ولاردىڭ قوعامدىق قاۋىپسىزدىكتى قامتاماسىز ەتۋگە قوسقان ۇلەسى اتاپ ءوتىلدى.
بايقاۋ قورىتىندىسى بويىنشا «اۋىلدىق جەردەگى پوليتسيانىڭ ۇزدىك قوعامدىق كومەكشىسى» نوميناتسياسىندا نۇرا اۋداندىق پوليتسيا ءبولىمىنىڭ قوعامدىق كومەكشىسى تولەگەن ەسمۇحانوۆ ءبىرىنشى ورىندى يەلەندى.
ال «قالالىق جەردەگى پوليتسيانىڭ ۇزدىك قوعامدىق كومەكشىسى» نوميناتسياسىنىڭ جەڭىمپازى بالقاش قالاسىنان كەلگەن انار ادامبەكوۆا اتاندى.
«بۇل ماراپات – اتقارعان ەڭبەگىمىزگە بەرىلگەن باعا. الداعى ۋاقىتتا دا پوليتسيا قىزمەتكەرلەرىمەن بىرلەسە وتىرىپ، قوعامدىق ءتارتىپتى ساقتاۋ جانە ەل تىنىشتىعىن قامتاماسىز ەتۋ جولىنداعى جۇمىستى جالعاستىرامىز»، – دەدى انار ادامبەكوۆا.
ايتا كەتەيىك، انار ادامبەكوۆا رەسپۋبليكالىق بايقاۋدا قاراعاندى وبلىسىنىڭ نامىسىن قورعايتىن بولادى.
قاراعاندى وبلىسىنىڭ پد ءباسپاسوز قىزمەتى
