ءۇرىمجى قالاسىنداعى شىڭجاڭ جانە ۋحان ۋنيۆەرسيتەتتەرى بىرلەسە ۇيىمداستىرعان ورتالىق ازياداعى كوممۋنيكاتسيا جانە مەديا بويىنشا IV فورۋم ءوتتى.
فورۋم اياسىندا عالىمدار تسيفرلىق تەحنولوگيالاردى دامىتۋ، ەمپاتيالىق كوممۋنيكاتسيا جانە وڭىرلىك سەرىكتەستىكتى نىعايتۋ ماسەلەلەرىن تالقىلادى.
ازيا ەلدەرىنىڭ قۇندىلىقتارى مەن فيلوسوفياسى رەتىندە بەيبىتشىلىك، ىنتىماقتاستىق، اشىقتىق پەن ينكليۋزيۆتى ءبىلىم باستى نازارعا الىندى. فورۋم اياسىندا عالىمدار 2027 جىلعا جوسپارلانعان «قىتاي - ورتالىق ازيا» ءىىى ءسامميتى قارساڭىندا وڭىرلىك ىنتىماقتاستىق، تسيفرلىق تەحنولوگيالار، جاساندى ينتەللەكت داۋىرىندەگى جۋرناليستىك ءبىلىم جانە ازيالىق بەيبىتشىلىك پەن ينكليۋزيۆتىلىك قۇندىلىقتارى كەڭىنەن تالقىلاندى.
عالىمدار تاريحتا ەل اراسىن جالعاپ وتىرعان جىبەك جولى بۇگىندە زاماناۋي كوممۋنيكاتيۆتى مادەنيەت قالىپتاستىرۋدىڭ سيمۆولى دەپ اتاپ ءوتتى.
فورۋمدا قازاقستان عالىمدارى اتىنان اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ زەرتتەۋشى پروفەسسورى، ساياسي عىلىمدارىنىڭ دوكتورى گۇلميرا سۇلتانباەۆا دەزينفورماتسيامەن كۇرەس ادىستەرى تۋرالى بايانداما جاسادى. قازاقستاندىق عالىم قر عىلىم جانە جوعارى ءبىلىم مينيسترلىگىنىڭ گرانتتىق قارجىلاندىرۋ جوباسى ناتيجەسىندە ورىندالعان زەرتتەۋلەرگە توقتالدى. جالعان اقپاراتپەن كۇرەسۋ مەن ونىڭ الدىن الۋدىڭ تسيفرلىق مودەلىن تانىستىردى. اتالمىش مودەل كوپ ءتىلدى ورتاداعى اقپاراتتىق اعىنعا مونيتورينگ جۇرگىزىپ، سۇزگىدەن وتكىزۋدە وڭدەۋ الگوريتمدەرى مەن نەيروجەلىلەردى پايدالانۋ ءتاسىلىن ۇسىنادى. سونداي-اق بۇل رەسۋرس يۋنەسكو ستاندارتتارىنا سايكەس مەديا ساۋاتقا ۇيرەتەدى. تۇجىرىمدامانىڭ پراكتيكالىق كورىنىسى رەتىندە RasInfo.kz پلاتفورماسى تانىستىپ ءوتتى.
شىڭجاڭ ۋنيۆەرسيتەتى جۋرناليستيكا جانە كوممۋنيكاتسيا مەكتەبىنىڭ پروفەسسورى ۆان فەيدىڭ «اقش-تىڭ ورتالىق ازياداعى مەديا-كومەگى: ينستيتۋتتىق ەكسپورت، مەديالىق ترانسفورماتسيا جانە گەوساياسي باسەكەلەستىك» اتتى بايانداماسى ەرەكشە نازار اۋدارۋعا تۇرارلىق. اقش-تىڭ ورتالىق ازيا ەلدەرىندەگى مەديا سالاسىن قولداپ، ونداعان جىلدار بويى قارجىلاندىرۋ باعدارلامالارى بولدى.
سوندىقتان قىتاي ۇكىمەتى دە اقش-تىڭ وسىناۋ مەديا ىقپالىنا الاڭدايتىنى بار، بۇل تاقىرىپتى عالىمدار توبى ارى قاراي تەرەڭدەتە زەرتتەيتىنىن اڭعارتتى.
ورتالىق ازيانىڭ مەدياەكوجۇيەسى ۇلتتىق ەرەكشەلىگىمەن، وڭىرلىك بىرەگەيلىگىمەن، سىرتتان قولداۋ كورسەتەتىن كۇشتەردىڭ ساياساتىمەن دامىپ وتىرعانى تاعى بار. ءۇرىمجى بۇل جولى سولتۇستىك-باتىس قىتايدان باستاپ ورتالىق قىتاي جۋرناليستيكا مەكتەپتەرى دەكاندارىمەن قاتار، قازاقستان، وزبەكستان، قىرعىزستان، تايلاند جانە رەسەيدىڭ كوممۋنيكاتسيا سالاسىنداعى مەدياساراپشىلارى، عالىمدارىنىڭ باسىن قوستى.
پروفەسسور گۇلميرا سۇلتانباەۆا ۋحان ۋنيۆەرسيتەتى جۋرناليستيكا جانە كوممۋنيكاتسيا فاكۋلتەتىنىڭ دەكانى، پروفەسسور ۆۋ شيۆەن مەن شىڭجاڭ ۋنيۆەرسيتەتى جۋرناليستيكا جانە كوممۋنيكاتسيا فاكۋلتەتىنىڭ دەكانى، پروفەسسور تسزين يۋيپينگە عىلىمي ەڭبەكتەرىن سىيلادى. سونداي-اق كىتاپحانا قورىنا تابىستالعان ەڭبەكتەر قازاقستان اتىنان ينتەللەكتۋالدى مۇرا بولارى ءسوزسىز.
فورۋمدا جۋرناليستىك ءبىلىم بەرۋدە حالىقارالىق اكادەميالىق ىنتىماقتاستىق ەرەكشە ءمان بەرىلدى. عالىمدار وقۋ باعدارلامالارىن جاساندى ينتەللەكت داۋىرىنە بەيىمدەۋ، بىرلەسكەن زەرتتەۋلەرلەر جانە بۇۇ تۇراقتى دامۋ ماقساتتارى اياسىندا مەدياجوبالاردى جۇزەگە اسىرۋ ماسەلەلەرىن تالقىلادى. كورشى ەلدەردىڭ اكادەميالىق تاتۋلىعىن نىعايتۋ جانە مەديا كەڭىستىگىن دامىتۋدىڭ ساراپتامالىق الاڭىن قالىپتاستىرۋ - عىلىمي شارانىڭ ناتيجەسى سانالدى.
