مەملەكەت باسشىسىنىڭ تاپسىرماسى بويىنشا «قازاقستان تەمىر جولى» كومپانياسى جۇزەگە اسىرىپ جاتقان تەمىرجول ينفراقۇرىلىمىن اۋقىمدى جاڭعىرتۋ جۇمىستارى اياسىندا قاراعاندى وبلىسىنداعى 14 تەمىرجول ۆوكزالى مەن جولاۋشىلار پلاتفورماسى قامتىلدى.
باعدارلاما كولىك قىزمەتىنىڭ ساپاسىن ارتتىرۋعا، جولاۋشىلار ءۇشىن زاماناۋي ءارى قاۋىپسىز جاعداي جاساۋعا، سونداي-اق ءجۇرىپ-تۇرۋى شەكتەۋلى ازاماتتاردىڭ ينفراقۇرىلىم نىساندارىنا قولجەتىمدىلىگىن قامتاماسىز ەتۋگە باعىتتالعان.بۇگىندە جاڭعىرتىلعان 11 نىسان پايدالانۋعا بەرىلدى. جولاۋشىلار نۇرا، قاراعاندى-سۇرىپتاۋ، جاڭا قاراعاندى، سارىبەل، مىرزا، ءداريا، اعادىر جانە مويىنتى ستانسالارىنداعى جوندەۋدەن وتكەن ۆوكزالداردى،
سونداي-اق ايسا، تەمىرتاۋ جانە قاراعاندى-سۇرىپتاۋ ستانسالارىنداعى جاڭارتىلعان جولاۋشىلار پلاتفورمالارىن پايدالانىپ ءجۇر. ال جارىق، بالقاش-2 جانە سارىشاعان ستانسالارىنداعى جۇمىستار اياقتالۋ ساتىسىندا.
ءاربىر نىساندى رەكونسترۋكتسيالاۋ كەشەندى جاڭعىرتۋدى كوزدەيدى. ونىڭ اياسىندا عيماراتتار مەن پلاتفورمالارعا كۇردەلى جوندەۋ جۇرگىزىلىپ، ينجەنەرلىك كوممۋنيكاتسيالار، سونىڭ ىشىندە سۋمەن جابدىقتاۋ، جىلۋمەن قامتۋ، ەلەكترمەن جابدىقتاۋ جانە كارىز جۇيەلەرى تولىق اۋىستىرىلۋدا. سونداي-اق عيماراتتاردىڭ قاسبەتتەرى مەن ىشكى بولمەلەرى، كۇتۋ زالدارى، سانيتارلىق توراپتار، جارىقتاندىرۋ جۇيەسى، جيھازدار مەن ناۆيگاتسيالىق كورسەتكىشتەر جاڭارتىلىپ، ۆوكزال ماڭى اۋماقتارى مەن جولاۋشىلار پەرروندارى اباتتاندىرىلۋدا.
جوبادا كەدەرگىسىز ورتا قالىپتاستىرۋعا ەرەكشە نازار اۋدارىلعان. ۆوكزالداردا پاندۋستار ورناتىلىپ، قولايلى سانيتارلىق بولمەلەر مەن مۇمكىندىگى شەكتەۋلى جولاۋشىلارعا جانە بالالى وتباسىلارعا ارنالعان كۇتۋ ورىندارى جابدىقتالعان. بۇل تەمىرجول ينفراقۇرىلىمىن حالىقتىڭ بارلىق ساناتى ءۇشىن بارىنشا قولجەتىمدى ءارى جايلى ەتۋگە مۇمكىندىك بەرەدى.
جاڭعىرتىلعان نىسانداردىڭ ءبىرى – 1965 جىلى سالىنعان قاراعاندى-سۇرىپتاۋ ستانساسىنىڭ ۆوكزالى. ۇزاق جىلدار بويى پايدالانىلعان عيمارات كۇردەلى جاڭارتۋدى قاجەت ەتكەن بولاتىن. قازىرگى تاڭدا بۇل ستانتسيا ارقىلى 21 جولاۋشىلار پويىزى قاتىنايدى. جۇرگىزىلگەن رەكونسترۋكتسيا ناتيجەسىندە جولاۋشىلارعا زاماناۋي جاعداي جاسالىپ، جايلىلىق پەن قاۋىپسىزدىك دەڭگەيى ەداۋىر ارتتى.
تەمىرتاۋ قالاسىنىڭ اقتاۋ كەنتىندەگى مىرزا ستانساسىنىڭ ۆوكزالى دا ايتارلىقتاي جاڭاردى. مۇندا شاتىر، قاسبەت، ىشكى بولمەلەر، ينجەنەرلىك جەلىلەر، پەررون مەن ارالدىق پلاتفورما تولىق جاڭارتىلىپ، جاڭا جارىقتاندىرۋ جۇيەسى مەن قورشاۋلار ورناتىلدى.
ءداريا ستانساسىنىڭ ۆوكزالى دا زاماناۋي كەلبەتكە يە بولدى. وندا كۇتۋ زالدارى، جەلدەتۋ جانە كونديتسيونەرلەۋ جۇيەلەرى، اقپاراتتىق ستەندتەر، قىزمەتتىك بولمەلەر، سونداي-اق ءجۇرىپ-تۇرۋى شەكتەۋلى جولاۋشىلارعا ارنالعان ينفراقۇرىلىم جاڭارتىلدى.
وساكاروۆ اۋدانىنداعى سارىبەل ستانساسىنىڭ ۆوكزالى دا كۇردەلى جوندەۋدەن كەيىن قايتا اشىلدى.
مۇندا عيمارات تولىق جوندەۋدەن وتكىزىلىپ قانا قويماي، ينجەنەرلىك جەلىلەر جاڭعىرتىلدى، ۆوكزال اۋماعى اباتتاندىرىلدى، جولاۋشىلار ءۇشىن جايلى جاعداي جاسالىپ، كەدەرگىسىز ورتا قامتاماسىز ەتىلدى.
